Jowai: Ka Khasi Students’ Union War Jaiñtia Circle hapoh i yahkhamt u President u Laitphar Syngkrem wa u General Secretary u Lurman B. Talang ha ka 26-11-2018 da lai sylli ki ya ki kot ki sla yong ki truck ki baar jylla kiwa wan kit moochuni pyrchah ya ka aiñ hapoh War Jaiñtia wei ka seiñ da chem ko wa em hadooh 298 tylli ki truck wa kiwa pynyieñ wow psiah cha Bangladesh toh kiwa ym biang ki kot ki sla kiwa mantre da ki baar jylla.
“Ini i wan kamai pyrchah aiñ da ki baar jylla ha kani ka thaaiñ yong i da man ko wow chim kabu wow knieh ya ki laad kamai ja kpoh yong ki tre chnong wei ka seiñ hadien wa da dep thooh bniah ko, da maham ko ya ki wa ym toh de wow wan kamai ki kat wym ye ki u pynbiang ya ki kot ka sla wa emkaam,” da ong ka seiñ.
Ka seiñ da maham joor ko leh ya kiwa khayi wa ymtoh u wanrah ki da ki truck kiwa mantre da ki baar jylla wow khayi tooh ki wow kwah myntoi samen kamjooh wow kdup ya ki baar jylla deiwa pyndooh nong ya kiwa khian wa nai hapoh War Jaiñtia.
Katkam ka yutip wa yoh ka seiñ wa kini ki truck toh kiwa da chah beh na Majai, Shella, Bholaganj wa kiwi kiwi ki thaw.
Ka seiñ da ong ko wa ym e laad wei ym chong kli kti ko wow yoh wan kamai kamni hapoh ka Bri u Ynñiawtrep wei daw pynman biang ko ya sylli ha kiwon kiwon ki sngi hadooh ki thaw tih moo wa ki baar jylla da sah ki pyrchah ya ka aiñ hapoh u pood u ang ka War Jaiñtia waroh kawi.
Ini toh katkam wa pyntip u General Secretary u Lurman B. Talang.
Discussion about this post