Ka Khooid Yaka Wah Myntdu ha i yahkhmat u Khroo L Pariat kam u President, ka H. Dkhar Asst. GS, u A. Lamare, Waheh Chnong Khimusniang, u Bimee Suwer, GS Loompyrdi Iongpiah, u M. Bareh, Waheh Chnong ka Dulong wa kiwi de deiwa emlang u R. Challam PHE (E) Sub-Division Jowai, ynne i step da lai booddien biang ki yei khooid i jngiar ka thaw pynlang um ha Oorkhla wa ha kiwi ki thaw pynlang um yow saam won cha ki thlu yung kiwa em ha kylleiñ ka chnong Jowai.
Ha ini i lai pait da chem wa ka um man hi ko kawa khooid tangwa neidaw wa kiwa boon ki thaw pynlang um da em kiwa da palat 30 snem tam kamtæ ka um wa pynpoi cha ki thlu yung man hi ko kawa jngiar tangwa kynroi ko teiñ teiñ.
Neiliang ka KYWM da e yumut ko ya u SDO wow thooh ki laad u tyrwa cha ki bor ka sorkar yow chna ya ki thaw pynlang um ha man ki chnong ha Jowai, khamtam kiwa ym em thlu um, kiwa duna wa tymbuin, kiwa kreh mylla, kiwa chong yungwai u yoh um ki man-i-por ka um wa saam ka PHE.
Heiyatoh wa ini i e yumut, u SDO da khana u wa ka yung krehkaam ka yong oo daw biah rong ko ya waroh ki thaw pynlang um ha kini ki tayaw wow wan yong uni u bnai wei yow phooh u miat ka chnong Jowai.
Ka KYWH da ong ko wa ka um kawa pynim yei manbru, kamtæ da kyrpaad ko ya waroh kiwa chong chnong yow sñiawbha u yaleh u sumaar, u syndong yaka Syiem Myntdu yow nang yoh um ki pynthor kba kamjooh yow ya mih chakhmat, u klam u yakrehlang waka chnat krehkaam ka PHE (Electrical) yow nang yoh yaka um kawa khooid ym toh du i jngiar wa u pahooh um ha ki bnai kiwa daw wan.
Ka seiñ da ong ko leh wa katkam ka hukum u Garod LSN Dykes, DC warim ka West Jaiñtia Hills, ka chnat krehkaam ka PHE (E) u pynkhooid ki man ka le bnai ya waroh ka thaw pynlang um. Kamtæ ka KYWM da kyrpaad ko ya u SDO yow bood ya ka hukum.
