Ki dkhot ka seiñ Khooid Yaka Wah Myntdu, (KYWM) West Jaiñtia Hills District hadien wa yoh ujor ki ha ka 16 tarik uni u bnai yei kylla rong ki thwai ka Wah Myntdu ha Syntu Ksiar. Ynne ka sngi da hiar ki cha ki bynta yong kani ka Wah ha ki thaw pynlang um ka yung krehkaam EE PHE (Electrical) Jowai heiwa da chem cha wah u pood ka chnong Chiliangraij da kylla rong ka wah nei noh khiar noh habra ki bru ya i khyndaw cha ki liar wa tooid cha ka.
Ha ini i booddien hapoh i yahkhmat u Khroo L Pariat wa u Oriland Shylla, da chem sakhiat yeini i kylla rong ha i thaw wa tip kam i Trepariat wei ha ini i thaw wan ka liar Thlumusniang wei hajrong ini, u Khroo Lamsalanki Pariat, da ong u wa i kylla rong ka wah toh nei yohlaad ki bru wow noh khiar ya ki khyndaw ha ki liar kiwa kai cha kani ka wah.
U D.H. Pde, Waheh Chnong ka Chiliangraij da ong u wa hajrong ka thong wow pynneh pynsah ya ki um ki wah, ki khloo ko kjam wa ki sim ki doh, neiliang ka Dorbar Chnong da booh ko ya ki kyndon wei hajrong i noh khiar ya i khyndaw wa i jakhlia ha ka wah Myntdu ha i bynta wa hapoh u pood u ang ka chnong, ka Dorbar Shnong daw leh ko yeiwa emkaam.
U Khroo Lamsalanki Pariat, President ka Seiñ da kyntu u ya ki paidbah wow krehlang neibynta i chngaaiñ wei wow yada ya ka Wah deiwa kyntu leh ya u Garod LSN Dykes, Deputy Commissioner wa u Bikram Marak (MPS) Superintendent of Police ka West Jaiñtia Hills District wow chimkhia wow leh deiwa khor katkam ka hukum ki kyndon ka aiñ Sec 144 CrPC katkam wa da hukum paidbah pyrchah ya kiwa pynsih ya ka wah Myntdu.
