Heiyatoh wa i pynbaad wa mih ka la’ærbih (Radiation) ha Nongbah Jynrin, Wahkaji, South West Khasi Hills District, neiliang ka sorkar jylla da kyrpaad ko ya ka skurbah North Eastern Hills Univeristy (NEHU) wow yarap ya ka kam ka Third Party Investigation, wow pyntikna sakhiat lada em ka la’ærbih kawa ktah ya ki paidbah ka thaaiñ.
Ka dhab wa ynru ngut namo ka Six Member Team hapoh i yahkhmat u Prof. B. Myrboh, Department of Chemistry, NEHU kam u Chairman da lai ki cha ini i thaw ha ka 10-11-2020 wei ya ka bui (Report) ka NEHU Expert Committee da yoh da ka sorkar jylla ha ka 17-12-2020 heiwa da pynman leh ya ka chong pyrkhat ha ka 20-01-2021 hapoh i pynlai u Chief Secretary ka jylla kam u Chairman.
Ha ka bui yong ka Committee da chem wa i man bih (Radiation Level) ha ki thaw pynlang ya ki jhep Uranium wa ki chnong wa em marjan katkam ka yukheiñ millisievert/year unit deiwa pynemkaam ya ki Radiation Survey Meter da chem wa ka la’ær man ko kawa biang wei hapoh wym em ma (within safety level).
Chooh chooh da chem wa 100 ft. na i thaw wa kai ka wah khian (rivulet) wa tip kam ka Phud Syngkai, da chem wa ka Radiation rap heh ko wei emkaam wow puræ bniah chooh yeini.
Kamtæ ka sorkar da rai ko wa emkaam wow puræ bniah ya ki moo wa i khyndaw ha ka wah Phud Syngkai khnang wow chemdien yeiwa sakhiat wa neiwon mih kani ka Radiation.
