Chem ka RJYF wa ha ki ar thaw hapoh ka Nongjngi Constituency da pyrkehkaam ya ka SAS u MDC du ha ka kot donhi

Jowai: Ka seiñ RJYF da pyntip ko wa katkam i chem yong ka hawa yaklam wa kiwa yahkhmat ki chnong wa u MDC ka 9-Nongjngi u Suklang Shylla, wa da em ki thaw kiwa pynkreh ya ka Special Assistance Scheme 2015-2016 man du i thoh hajrong ka kot sada khlem em i kreh ha i thaw wa toh u leh yei kreh.

Ka seiñ da pyntip ko wa katkam ka RTI kawa da yoh na ka JHADC, u Suklang Shylla da yoh bhah u naka Special Assistance Scheme 2015-2016 kamwa Chi Klur Chi lak tyngka T. 1,01,00,000 wei na kani katkam i chem ka seiñ deiwa yaklam wa kiwa yahkhmat ka chnong yong ki ar thaw da ong ki wa ym tip ki iyi iyi ya kani ka Scheme, kawi ha Khliehriat Nongjngi kawa e pyrtuid (Construction of Community Hall at Khliehriat Nongjngi Village) haka dor T. 6,00,000 (Ynru lak) wei sa kawi ha Kyndong Tuber kawa e pyrtuid (Construction of New Hope English School Building at Kyndong Tuber) kawa chong dor T. 5,00,000 (San Lak).

Neiliang ka seiñ da kwah ko yei pynche hapoh le sngi heiyatoh wa kani ka poisa paidbah. Lada ym yoh pynche hapoh le sngi, neiliang ka seiñ daw lai ko da kawi ka luti yong ka aiñ wei ha i jooh i por ka seiñ ka maham joor ko ya kiwi kiwa mihkhmat paidbah lada pynemkaam bakla yaka poisa paidbah, ka seiñ ym elaad ko.

Ini toh katkam wa pyntip u Moonki Sana Organizing Secretary ka seiñ.