Jowai: Ki 6 ngut ki MLA ka Congress wa kyntup ya ka Dr. M Ampareen Lyngdoh, George B Lyngdoh, u H M Shangpliang, u Mohendro Rapsang, u Dr. Azad Aman wa u Shitlang Pale hadien wa wan ki na Ksan yow sakhi deikhmat yong ki ya ini i thaw wa jia wa i kreh wow sai ya kiwa chah kset hapoh ka krem mooyong wa em ha Ksan, da chem ki ya kiwa boon ki duna wei da pyntip ki ya ini manda poi ki ha Jowai deiwa yachem biang wa kiwa thoh khubor ha Circuit House, Jowai.
Ki MLA ka Congress da ong ki wa sniawphylla ki u tip wa u DC ka EJH lai chuti u ha kam ini i por wei ym de booh næ thung bru wow pait wow pynlai ya kani ka kaam sai ya kiwa chah kset hapoh krem mooyong wei ya u DC toh u phah wan kreh biang oo.
Da chem ki leh ym em kattæ ka sniawthooh lang hapyrdi ki bor district wa ki NDRF kiwa da kreh jar jiar ki kaam khlem em ka sniawthooh namo ka kreh lang. Ini da wanrah ko yei sepai i por wa da booh ya ki maa chooh chooh ya kiwa chah kset. Kamtæ ka sorkar emkaam ko wow thung u sahep wa ksoh kyrdan Commissioner & Secretary wow pait ya kani ka kaam u wow khlieh ya kani ka kaam heiwa waroh hap wan pyntip yeiwa emkaam ki wei wow e Report ki cha oo, wei ini daw pynsmat ko yei krehkaam.
Emkaam leh wow booh ya u sahep pulit wa em ya ka kyrdan IGP ha kani ka thaw u wow krehlang wa ki NDRF, SDRF wa ki pulit ka jylla.
Da emkaam leh ki Tent wa bha wa kiwi kiwi kiwa emkaam kiwa kreh ha kani ka thaw neidaw wa i thaw kreh ki man i iwa chitom bha wei wa kammon wow pynkhreh ya ka luti ka syngkeiñ chwa wow poi ki Pump wa khlaan bor cha kani ka thaw yow lait u sepai i por.
Emkaam leh ki bru na ka chnat i chait i khiah kiwa wow em waroh chi miet chi sngi ha kani ka thaw heiwa katni da wan ki du ha ki por wa emkaam ki wei lada ym dap bru ye u phah na Jowai wa na Shillong cha kani ka thaw.
Waroh ini, ki MLA ka Congress da pyntip u wa da phah cha u montri rangbah ka jylla u Conrad Sangma yow ye u leh yeiwa emkaam.
Discussion about this post