Ki pulit ka Arunachal Pradesh ha Lower Subansiri District ynnin ka sngi da chem ki yei metyap ki 3 ngut ki bru napoh Hotel wa em ha Hapoli kiwa da yap na ki daw wym pu ye u ong tikna wei kini ki bru toh kiwa na Kerala katkam wa pyntip u SP ka Lower Subansiri.
Da ong u wa da thung da ki pulit wow pait kyrpang du ya ini i kaam wei daw pyntip chooh chooh hadien wa yoh yaka Medical Report.
Kini kiwa yap kynthup ki ya ki chi kurim kiwa na Kottayam deilang wa kawi ka lok ki kawa na Thiruvananthapuram wei yei metyap ki da chem hapoh ka Hotel Blue Pine wa em ha Hapoli, kawa man leh kam ka District Headquarter.
Waroh kini ki 3 ngut toh kiwa da em palat 30 snem i rta wei da poi ki ha kani ka Hotel haka 28 tarik u bnai wa dep deiwa wan da ka lieñsuiñ na Guwahati haka 27 tarik.
Katkam wa khana ki pulit da kit yei metyap cha District Hospital yow leh Post-Mortem wei da suba wa da pynkut hi ki yei mynsien ki tangwa ym pu nood wow ong deiwa tikna.
Kawa na Thiruvananthapuram da tip kam ka Arya B Naiar katwa kiwa na Kottayam toh ki chi kurim, kitæ u Naveen Thomas waka Devi B kiwa da ieh yei kreh kam ki Ayurveda Doctor ha Kottayam District.
U Naveen toh uwa kreh kam u Online Trader katni katwa ka kurim u, ka Devi toh kawa sikai ktien German ha kawi ka skur ki bru samen wei ka wei ka Arya toh kawa sikai ktien French ha ka jooh ka skur.
Ka Devi toh ka khon yong uwa chongdur mrad (Wildlife Photographer) wa pawnaam wa tip kam u Balan Madhavan uwa da ong wa ki chi kurim toh kiwa im dei suk dei kmen ha yung ki ha Kottayam wei ym tip de kammon u ong yeini wa jia.
Iwi wa phylla toh wa kiwa ha-yung ka Arya da e FIR ki wa wiar ko nadooh ka 27 tarik ha Thiruvananthapuram Police Station heiwa hei takit ki pulit da chem ki wa da hær ko cha Guwahati deilang wa kiwa chi kurim heiwa hadien ini da poi ki cha Arunachal Pradesh.
Kiwa kreh ha ka Hotel da pyntip ki wa hadooh ka 31 tarik dang yoo ki ki tangwa haka 1 tarik ym em de yoo ki wei hei step ka 2 tarik da lai choh dwar ha ka kamra wa sah ki tangwa ym em wai kamtæ da tympra ya ka dwar heiwa da chem waroh 3 ngut da yap ki heiwa da pyntip cha ki pulit heipor 10:30 i step.
Ya ka Arya da chem na thaw thiah wa ki dak ah ha rdang kti, ka Devi toh kawa thiah yap ha khyndaw deiwa em dak ah ha kti wa ha rdang katwa u Naveen da chem na kamra sum deiwa em ki dak chah ah ha rdang kti.
Da em leh ka khubor wa ong wa kini ki bru toh kiwa ngait yei im biang sa chisien hadien wa yap wei da thoh ki leh yaka chithi wa ki ym em dap ram ki, ym em chem chitom ki iyi iyi leh tangwa u lai ki chei thaw wa toh u em ki heiwa ya kani ka chithi da soi da waroh le ngut.
Discussion about this post