Chem kiwa na Assam ya ka bei ki na Sabahmuswang Halfway Home kawa wiar la 3 snem

Ka Sabahmuswang Halfway Home kawa man kam ka thaw wa pait wei yarap ya kiwa chitom hei bor pyrkhat hadien wa mih ki na ki thaw sumaar deiwa e sikai yow tip ki u kreh yow ye biang ki u psiah cha ka imlang sahlang.

Kawi na kawa da pait da kani ka thaw toh kawa tip kam ka Jiratan Bibi kawa da wiar na yung ko la 3 snem wei da em ko hapoh kani ka Halfway Home la 9 bnai kattu, wei da wan thooh ka da kiwa ha-yung ko wei da skahi yeini da ka D.V. Lyngdoh, Additional Deputy Commissioner, ka R. Passah, District Social Welfare Officer Jowai, u Dr. H.H Mohrmen, Secretary ka SURE waka Niwanka Shylla, Project Coordinator wa kiwa kreh ka Halfway Home.

Ka R. Passah hawa e yei klam da ong ko wa kawi na ki thong ka Halfway Home toh yow thooh biang ya kiwa ha-yung kiwa chah sumaar wei da e kti hadien wa da pyntikna ya ki kot ki sla kiwa ha-yung ka Jiratan Bibi.

Neiliang ka D.V. Lyngdoh won da pynsñiaw ko yei kmen wa kani da man ko ka sien wa nyngkong hapoh waroh kawi ka jylla wa da ye u chem biang ya kiwa ha-yung kiwa chah sumaar hadien wa sah ki ha ki Halfway Home.

Related posts

U bichaar ka High Court lada ym ye ki sorkar wow pynbait yei long i man ha NEHU

November 13, 2024

Ileh wa e kti yow pynchna ya u saroh NH-6 cha ka Dhar Company ka wym biang tiar biang bru: KSU-EJHDU

November 13, 2024

Ka Jiratan Bibi toh kawa da em 58 snem wei da li booh ka ha MIMHANS, Shillong haka 07-06-22 hadien wa chem wa uiñ ko cha wah cha neiñ ha ki thaaiñ Byrnihat wei man ko leh kawa chitom i bor pyrkhat, kamtæ da chimkti ka da ki pulit hadien wa pynmih hukum u Additional District Magistrate ka Ri-Bhoi District wei da li booh ka cha MIMHANS yow yoh ko yei sumaar.

Hadien wa dep sumaar ha MIMHANS, da phah ya ka cha Halfway Home Sabahmuswang haka 11-08-23.

Ya ka Jiratan da pyrchang wow yaleh Aadhaar ka heiwa da chem toh kawa da em pyrtuid chwa neibhah manda chim yei chon ki pariam kti ko da chem wa toh i jooh wa kawi won ka bru wa em ha Assam wei heini i por da tip yei pyrtuid tre ko kam ka Jiratan Bibi kawa man ka khon u Jadab Ali wei da ye leh wow chem ya ki Phone Number kiwa ha yung ko wei da e kti wow booddien yeini i kaam da ka District Task Force.

Kamtæ hadien wa yoh u yaklam wa kiwa ha-yung ko da pyntikna ki wa em hi ka bei ki kawa tip kam ka Jiratan heiwa da phah yei dur ko cha ki kiwa dang artatien neidaw wa da pher i dur ko tangwa da e laad ya ki wow yaklam ki wa ka lyngba ka Phone heiwa da ye wow pyntikna wa toh hi ka kawa da wiar na yung wei da joo ki umkhat wa kmen heini i por wa yaklam Phone ki wei da kmen ki leh wa dang im hi ko.

Hadien wa dep u leh ya waroh iwa emkaam da wan thooh ki ka wei da pynsñiaw ki yei sñiawngooh ya ka Halfway Home wa sumaar ki yaka bei ki hadooh wa da yoh ki u li yah biang ka cha yung.