I beh ka seiñ HANM ya ki 300 ngut ki bru na Mawdiangdiang, New Shillong ha ka 3 tarik uni u bnai deiwa pynbaad wa ki toh kiwa poi wiar ki wym biang ki kot ki sla, da mih i beiñ na kiwa boon neibhah kini ki bru toh kiwa wan uiñke suwari kiwa 90% na ki toh kiwa em 65 snem chaneiñ wei da em ki du kamwa 150 ngut.
Kini dapoi ki heipor kamwa 3:00 waje i step ha Mawdiangdiang hadien wa wan ki na Guwahati deiwa thooh thaw sah wei kini toh kiwa da lai kylleiñ kylleiñ ka ri cha ki thaw leh niam wa man kyntang wei i thong yong ki toh wow lai cha Nartiang tangwa neidaw wa da ngiah ware ki deiwa lai luti da ka Bus la 12 sngi, da rai ki wow sangeh ha Shillong yow lai paitke ya ki thaw wa pawnaam ka thaaiñ.
Neiliang kawi na ki Guesthouse wa sah kini ki bru da pyntip ki wa heipor kamwa 9:30 i step ha katai ka sngi khlem da yoh bha kini ki bru u thiah, da chah kyrsu ki ha ki bru wa ong wa ki toh ki dkhot ki seiñbhalang kiwa da ong wa ki Guesthouse ha Mawdiangdiang toh du ya kiwa wan phah sumaar donhi wei hadien ini da chah khut leh sa ya kiwa yah Bus hadooh wa da hap wow khut pulit wei i ya kajia da neh i hadooh 2:00 waje i sngi hanla da em ki pulit ka Mawdiangdiang.
Kini kiwa wan uiñke suwari da dep chwa ki wow chim (Book) da ki Bus ka Meghalaya tangwa da hap ki wow chim da kiwi ki Bus yow kit ki cha Sohra hadien wa jia ini wei kini ki Bus da sangeh ma sangeh ki neidaw wa hiar dih sikret kiwa yah Bus wei hadien wa poi ki ha ka yingkieñ Mawkdok da chah thooh kajia ki wa ym em su poisa wow lai chadooh cha Sohra kamtæ da liwan ki wei da em iwi i por wa kini kiwa yah Bus da kset ki ki kini ki bru hapoh kari. Da pynbaad leh wa kini kiwa yah Bus da chah pynbor ki ha ki seiñbhalang wow yah ya kini ki bru du hadooh 7 Mile donhi.
Ha ka 4 tarik won heipor kamwa 1:00 waje i step hawa thmu won ki u mih yow lai cha Nartiang da chah thooh kajia ki ha uwi uwa da muaid heiwa da wan ki pulit ka Mawdiangdiang wa u waheh chnong tangwa uni u bru da pteiñ bait u wow thooh kajia deiwa ong wa lada ym mih ki neini daw thang u dei thang. Tangwa da ye ki pulit u pyn jai-jai wei da yoh ki wow mih dei suk.
Neiliang kiwa pynlai ya kani ka Guesthouse da ong ki wa kini ki bru kiwa kwah du wow lai pait ya ki thaw wa miat da hap ki wow maad chiboon i kthang wei da yooluti ki wa kam ini i jia ym pyntieñ ko ya kiwi wow wan ki chapoh ka jylla neibhah ka jylla toh kawa ye u pynyoo yei bha ya kiwa wan ke.
Puræ leh: Beh ka HANM ya ki baar jylla wa wan da le tylli ki Bus ha NEIGRIHMS
