Hadien wa ini wa dep da yoh wow pynuiñ biang ya kawi ka manbei kawa na Assam kawa da wiar le snem kawa chah sumaar ha Halfway Home wa em ha Sabahmuswang, ha kani ka kynti da yoh wow pynuiñ sa kawi kawa na Karbi Anglong cha kiwa ha-yung ha-sem ko.
Kani ka Halfway Home wa pynlai da ka Society for Urban Rural & Rural Empowerment (SURE) toh kawa pait wa sumaar ya ki bru wa chitom i bor pyrkhat pyrdaiñ hadien wa da yoo biang yoo hoi u pynlait ki na MIMHANS wei man ko leh ka thaw sah ya ki wei wow pynkhreh ya ki yow psiah biang ki cha ka imlang sahlang.
Kani kawa dang yoh wow pynuiñ cha kiwa ha-yung ko toh kawa tip kam ka Glorina Shadap kawa tip leh kam ka Martina Kolar kawa 51 snem i rta wei kawa chitom Chronic Schizophrenia. Da sumaar ya ka ha MIMHANS nadooh ka 07-03-21 hadien wa lai e kti ki pulit ka Mawlai Police Station neibhah wa chem ka wa uiñ ko chawah chaneiñ ha thaaiñ Mawiong.
Nyngkong ha MIMHANS ym sñiawthooh wot yeiwa klam ko leh tangwa hadien wa da yoh ko yei sumaar da sdang ye ko wow klam wei da khana ko wa i pyrtuid ko toh ka Glorina Shadap wei kawa na Karbi Anglong District, Assam tangwa ym em de tip iyi iyi chaphang yong ka lait na ini.
Ya ka Glorina Shadap da phah cha ka Halfway Home Sabahmuswang ha ka 11-10-23 wei ha ka 15 wa 17 tarik u jooh u bnai hadien wa yaklam ko wa kawi na kiwa chah sumaar ha ini i thaw kawa tip kam ka Ilasiewdor Gashnga, da khana ka Glorina wa i chnong ko toh na Umswai, Amsohbra wa dang em ha Karbi Anglong District wei da dep bia ko la ar sien nyngkong wa u Romin Marak tangwa hadien wa khlaad u da bia won ko wa u Lenus Malang uwa na ka jaitbru Tiwa wei da em ko 3 ngut ki khon.
Da khana ko leh wa em ko kawi ka payu waheh wa tip kam ka Regina Shadap wei u kurim ko toh u John Teron uwa sah ha i thaw wa tip i Trilate. Ka Glorina da khana ko leh wa kynmoo hi ko yeiwa chah rah ko ha ki pulit cha MIMHANS tangwa katni da kwah ko u liwan yung noh.
Kamtæ da Phone ya uwi uwa sah ha Jowai uwa na Karbi uwa tip kam u Rolinson Teron uwa da wan wow yaklam wa ka Glorina heiwa da tip chooh chooh chaphang yong ka wa i chnong tre ko wei oo leh em bru hi u kiwa emyatoh ha itæ i chnong.
U Rolinson Teron deiwa tip yeini da Phone u cha kiwa emyatoh u wei da yoh u wow yaklam wa u Kong ka Glorina uwa tip kam u J. Teron uwa da pyntip won cha kiwa ha-yung ha-sem ka Glorina kiwa da paan por chi tayaaw yow pynbait ki yei kaam i jaam yow wan thooh ka.
Kamtæ ynne ka sngi da wan u khon ko deiwa emlang ka diah ko wei da e kti ka cha ki deiwa sakhi lang ka R. Passah, DSWO, u Dr. H.H. Mohrmen, Secretary SURE, u Rolinson Teron, ka Celina Kholar (ka diah ka Glorina) wa u khon ko u Nelson Khorar.
Ka Celina da khana ko wa da wiar ka Glorina nadooh u Wisu (Mar) 2021, wei da thooh ki ka kyllieñ kylleiñ wei da mut ki wa da yap ko. U khon ko, u Nelson Khorar da ong u wa da kmen u wow yoo biang ka ka bei.
Da emlang leh u John Teron, u kong ka Glorina ha kani ka sngi.
Discussion about this post