Chemdien u Wyrta yei chah lehbor ki Pnar ha Moulvibazar, Bangladesh

Jowai : “Pyrkhat won ya i lada mih i neini iyi won de u leh i kattu” da ong uwi na kiwa chong chnong ka Nahar Kailin, Sreemongal, hadien wada mih ka hukum na u ka Office u District Magistrate, ka Moulvibazar (Revenue Branch) heiyatoh wa chah beh chnong ki Khasi, Pnar na ki ar tylli ki chnong.

Neiliang u Wyrta nadooh wa mih kani ka hukum da boodien u ya kani ka khubor wei ha kani ka kynti da yoh u yaklam waki tre chnong wow ngam yillu heiyatoh wa kani ka hukum.

Kini ki chnong toh wa chah beh ki Pnar kynthup ki yaka chnong Nahar Aslom waka Nahar Kailin, wa em hapoh ka Sreemongal Subdivision, Moulvibazar District wei man ki ki chnong wa chong wasah daki Pnar wa kattu katni ki Garo wei em hadooh 700 tam kiwa chong chnong ha kini ki ar chnong.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Ha Nahar Aslom em kamwa 42 tylli ki manyung wa kawi ka school Pre-Primary kawa hadooh class 5. Katwa ha Nahar Kailin won em palat 65 tylli ki manyung kamjooh leh em ar tylli ki skur kiwa hadooh class 5. Ha kini ki chnong leh em ki yung mane kamka yong ka Balang Presbyterian.

Heijooh i por kini ki chnong man ki leh kiwa sahdien bha neibhah ki Mobile Network leh man kiwa thut, ymem bordiñ (light) ki heiwa chaniah ki du haki bor Solar, wei ki bru im ki du hei rep pathi wow kwai.

“Da chnong chnong i heini kattu da palat 75 snem nadooh ki ma ki woh yong i” da ong u Waheh Chnong  Dibarmin Pohtam, u Waheh Chnong ka Nahar Kailin.

Kini ki chnong man ki kiwa yajan bha wa kawi ka kpær rep slacha kawa tip kamka Nahar Tea Estate kawa da seiñ nadooh u snem 1964 wei da chimkti yaka da kawi ka Company waheh bha kawa datip kamka City Group.

Kani ka City Group man ko kawa da seiñ ha u snem 1972 wei man ko leh kawi naki company waheh tam ha ri Bangladesh, wei hapoh yongka em kamwa 23 tylli ki tnat kam i phniang, ki that ki nep, i blooh, chini, insurance, ka Channel TV (NEWS), wa kiwi kiwi.

Katkam ka yutip wa tikna kini kiwa chong ha kini ki ar chnong, jooh su ki yaka bai thaw chaka Union Parishad kawa yasariem waka District Council cheini. Jooh su ki leh chi sein chisnem yaka baithaw kamwa T. 100- T. 150 yakiwa em yung khian, katwa T. 200- T. 250 kiwa em yung wa heh chi snem weiwa dangdep su wot ki hachwa u kut u snem 2015.

Da kynnoh wa ki tre ka City Group da kwah ki u pynkmai yei thaw rep slacha yong ka (Nahar Tea Estate) wei manda lai yachem kini ki trechnong yaki tre da tyrwa poisa pathan ki yaki tre chnong yow mih ki neini.

Heiyatoh won wa kani ka hukum da ong ki tre chnong wa kani ka hukum da pynmih sop sop da ki bor District neibhah wa da yoh ki du yaka Xerox Copy hadooh katni (Hei sniawthooh u Wyrta iwa mut wa ye ki bor District u e yaka original copy du kattu katni sngi chwa u poi ka 12 tarik).

Da kynnoh wa yoosar ya kani ka hukum da u pynmih rieh deiwa yasñiawthooh hapyrdi ki tre kani ka Company waki heh ka District neibhah wa hadooh katni dang em ka mukotduma wadang sahteiñ ha Yung Bichaar ha Moulvibazar.

Heijooh ipor neiliang ka Bangladeshi Adivasi Forum da kular ki wow yarap ya kini ki paidbah ki ar chnong.

Ki waheh na kini ki chnong dang thooh laad ki wa kammon u yoh yarap ki wow yada hei hok i kynti yong ki iwa ye ki u dooh pyn hapoh chitayaw weiwa ympu em u booh salan ka sorkar yeithaw wow kyrriah ki.