Shillong: Ka sorkar jylla dang yang ko ya ki aiñ chna yung na ki le tylli ki Autonomous District Council (ADC) wow pynlait ya ki thaw wym haap ha ka Municipal na ki aiñ chna yung ka Meghalaya Urban Development Authority (MUDA).
“Wow lait na ki aiñ chna yung ka MUDA ha ki thaw wym haap ha ka Municipal ha ki ADC wow pynkhreh da ki aiñ ka Council, kamwa dadep ka KHADC dadep ko, tangwa ka JHADC wa ka GHADC ympu em kam kani ka aiñ wei ka sorkar kwah ko wa ka aiñ u man ko ka jooh ha waroh le tylli ki ADC,” da ong u Hamletson Dohling, u montri ka kaam pynroi sor ka jylla ba wa tip leh kam ka MUDA.
Da ong u leh wa ka sorkar ym kwah ko wa ki aiñ chna yung u yaphær ki wei emkaan wa waroh le tylli ki council u phyllu ki wow chna ka jooh ka aiñ.
“Ka sorkar ym chimpor ko wow pynlait ya ka aiñ ka MUDA lada ki ADC ye ki wow booh da ki aiñ yong ki ha ki thaw wym yahaap wow em ka Municipal,” da ong u.
Hajrong i wym ye ka sorkar wow pynbait ya i eh i khoo wa ki paidbah yachem ki, neiliang u montri da ong u wa ini i kaam da slem bha i wa ka sorkar MDA kawa dang ynru bnai tangwa ki kaam laiki chakhmat wow pyndooh yeini.
Da ong u wa kattu katni bnai nachwa ha ka yalang ki CEM ki le tylli ki ADC ryngkat i emlang kiwa synchaar chnong, ki sahep sorkar da klam che wa emkaam ki aiñ chna yung wei da ekti yeini ha ki District Council.
“Ym kwah i wow man kam ka sorkar warim, i haap pynbiang lut i din pa din hadien wa da yoobiang daw pyndam ya ki wei daw ekti ha ki ADC,” da ong u montri.
Da pyntip u leh wa dadep e por chi bnai ya ki District Council wow wanrah noh da ka aiñ chna yung wow pynlait yei tia pood ka MUDA ha ki thaw wa pait ki District Council.
Discussion about this post