I angnood ki paidbah ha West Jaiñtia Hills toh wow yoh noh ya ka Iawmusiang Market Complex kawa haap hapoh ka Jaiñtia Hills Autonomous District Council (JHADC) tangwa i kreh da man i iwa sahteiñ bait hadooh kini ki sngi.
Kam wow pynkynmoo wa ya u mooyurim wow sdang krah da booh da u Purno A Sangma (baam kwai ha dwar u Blai) ha u Duiyatra (Jan) 2009 heiwa ka chnat DoNER da mynjur ko wow kyrchaan poisa ya ka JHADC wow chna ya kani ka yaw.
Hawa yaklam wa u MLA ka Jowai, u Wailadmiki Shylla da pyntip u wa ka Iawmusiang toh kawi na ki Project kawa da sah slem bha, wei neiliang ka sorkar jylla da chimkti wei da yaleh ko wow pynbait yeini hadien wa tip wa chem chitom wow yoh ya ka poisa na ka sorkar pyrdi, tangwa da ong u leh wa u Montri Rangbah ka jylla, u Conrad K Sangma da kular u wow pynlut da ka sorkar khnang wow ye u pyndep ya ka Iawmusiang hanla ym yoh yarap de ko na ka sorkar pyrdi.
Da ong u wa katni i kreh da sdang i wei daw chna ya ka ha ki soo Block wei manda dep ya ka Block wa nyngkong kiwa chong yaw daw yoh noh ki u chong katwa i kreh ya kiwi ki Block dang lai neibhah lada yang hadooh wa dep u chna daw chimpor i.
Katkam wa pyntip u MLA, na ka chnat DoNER da dep mang ko T. 6.33 klur ha ka bhah wa nyngkong, heiwa da ong u wa lada i kaam u lai bait i, ya kawi ka Block daw ye u pyndep hapoh 6 bnai, wei wow pyndep ya waroh i chna daw chimpor sa kamwa 2 snem.
