U sahep pulit warim ka Meghalaya Police, u Nurul Islam da phah kset ya oo waroh chi rta da ka yung bichaar ynnin ka sngi deilang waka kuna wa T. 8 lak yeiwa slaitbor u ya ki arngut ki chi payu ki khynnah kynthai iwa da jia pyn hapoh ka Ampati Police Station ha South West Garo Hills District ha u Wisu (Mar) 2013.
Ya ka hukum da pynmih da ka POCSO Special Judge ka East Khasi Hills kawa da phah su T. 3 lak ya u Islam cha ka waheh na kini ki chi payu wei wow kset ya oo deiwa pynchitom 7 snem wei wow su leh sa mar T. 1 lak cha kini ki arngut wa slaitbor u hapoh ka Section 376 (02) ka IPC wa Section 10 ka PCSO Act, 2021.
Ka yung bichaar da phah kset ko ya oo sa chi snem hapoh ka Section 342 ka IPC, 1860, waka kuna wa T. 1,000 yow su cha kini ki arngut chi payu wa kamjooh leh ya kawa emyatoh ki kawa da chah rah ha ki pulit kawa da emlang ha Ampati Police Station ha i miet ka 13-03-13.
Da phah kset oo leh sa 5 snem hapoh ka Section 354 ka IPC wei da daiñ kuna T. 50,000 wa hap su u cha ki arngut kiwa chah slaitbor.
Da phah kset ya oo leh sa 10 snem hapoh ka Section 450 ka IPC deiwa su kuna kawa T. 1 lak cha kawa ar wa slaitbor u.
Da phah kset ya oo sa ar snem hapoh ka Section 506 ka IPC wei wow su T. 50,000 cha ka wa ar wa slaitbor u.
Ka hukum kawa em 87 sla, ka POCSO Court da ong ko wa u Nurul Islam da pyndooh burom u ya ka chnat wa kreh u wei da ktah i leh yei chaniah ki bru ha ka aiñ, kamtæ ka yung bichaar da sñiaw ko wa emkaam wow pynyoh biang yei chaniah ki bru paidbah kamjooh kini kiwa chah slaitbor deiwa pynyoo wa krehkaam hi ka aiñ wei ym elaad ya kiwon kiwon lada em ki ha kawon kawon ka kyrdan wow pynsih yei pyrtuid wa ki yurim wa ka aiñ krehkaam ko.
Kam wow pynkynmoo wa u Islam da slaitbor u ya kawa dang 13 snem ha Ampati Police Station ha ka 13-03-13 wei da leh biang u yeini i kaam ha ka sngi wa bood. Ha ka 31 tarik won u jooh u bnai da slaitbor u sa ya ka payu kani ka khynnah kawa em 17 snem deiwa pynyang suloi ha yung yong ka deiwa maham wym toh u khana ko ya kiwon kiwon.
Hadien ini, u pa kini ki arngut da ujor u da ka FIR pyrchah ya uni u heh pulit.
