Ka Synjuk Waheh Shnong East Jaiñtia Hills District (SWSEJHD), ynnin ka 2 tarik da yoh ko u e dorkhat ha u Montri Rangbah, u Conrad Sangma kawa kynthup chiboon ki mat dawa neibynta ka District kawa man ka District kawa dang sahdien ha kiwa boon ki liang hanla ka District toh kawi na ki District kawa pynmih boon ka dan ya ka sorkar jylla tangwa sñiawkhia u ong wa dang boon i duna ha ki liang waroh nadooh wa da yoh ya ka District wa pura.
Kamtæ ka synjuk da booh ko yei dawa pynbha pynmiat ya u sarok National Highway-6 neibhah uni u sarok da man u uwa sih cha wa palat hadooh wa da booh ko hei eh hei khor ya kiwa lai wa wan lyngba uni u sarok.
Ka SWSEJHD da sñiawkhia ko leh hajrong i oor khyndaw man-i-por ha Sunapur Tunnel iwa da booh hei maa ya kiwa lai wa wan lyngba uni u sarok NH-6, heijooh i por da pynman ko i thut i pynsahkut kari man-i-por neidaw wa oor khyndaw bait, katwa kamtæ ka synjuk da dawa ko na u Montri Rangbah u chimkhia u wow lai yaklam wa ki bor yong ka NHAI wow chna ya ka Tunnel ha kini ki bynta wa oor khyndaw khnang u lait ko u booh hei maa ya kiwa lai wa wan.
Da dawa leh wow pynheh ya u sarok NH-6 cha u sarok Four Lane khnang u lait u sahkut kari neibhah uni u sarok da man u u budloom yong ka jylla Meghalaya ha ki liang waroh khamtam da man u leh u sarok wa lai luti da kiwa boon ki jylla ka thaaiñ mihsngi.
Chooh chooh da dawa leh u chna ya u sarok Sutnga-Saipung uwa em kamwa 46 Km wei i man yong uni u sarok leh da sih ware chawa palat heiwa da booh bha hei eh ya ki paidbah khamtam ya kiwa kjut wa chitom.
Kamjooh ka seiñ da dawa ko leh wow booh ya ka Government Secondary School, ka Government Higher Secondary School waka Government College hapoh ka District neibhah hadooh kattæ ym pu em tang kawi wot leh kam kini ki thaw puræ hapoh ka District heiwa da booh bha ko hei eh hei khor ya ki bei ki pa yong ki khynnah wow phah skur ya ki khon yong ki cha baar ka District neibhah nadooh wa khang tih mooyong da boon ki khynnah wa pep skur chitieñ por neidaw wym yoh laad de ki u phah skur ya ki khon ki kti yong ki. Kamtæ da dawa na u Montri Rangbah wow pynyoh smat ya kini ki skur sorkar hapoh ka District.
Heijooh i por ka synjuk da dawa ko leh wow booh ya ka Land Custom Station hapoh ka District khamtam ha ki bynta ka chnong Kuliang namo ha kiwi ki bynta yong ka East Jaiñtia Hills khnang u pynsuk ko ya i khayi hapyrdi ki ar tylli ki ri (India-Bangladesh) lyngba ka jylla Meghalaya kam chibynta ka laad kamai khajih ya ki paidbah neibhah ka East Jaiñtia Hills da em ko chiboon ki mar pohkhyndaw nadooh u moochuni, mooyong, ki mar rep wa kiwi kiwi.
Kamtæ neiliang u Conrad Sangma, da kular u wow chimkhia ya kini ki mat dawa yong ka synjuk khamtam deiwa ya krehlang chirup wa ki ar MLA yong ka District.
Khaddooh, hajrong ka luti rel kawa da yoo ha ki kot khubor kamwa da klam leh da u Conrad, neiliang ka synjuk da paan ko yei pynche na oo neibhah katkam wa man kattæ ka synjuk ym pu yoh yutip ko iyi iyi leh chaphang kani ka kaam rel hapoh ka District, kamtæ neiliang u CM da ong u ya ka synjuk wa daw phah u da ka chithi neibynta i paan pynche (Clarification) yong ka synjuk.
Kani toh katkam ka khubor wa pynlait lyngba u Hambertus Nongtdu, President SWSEJHD wa u Jesper Bareh, General Secretary SWSEJHD.
Discussion about this post