Ka Jaiñtia Students’ Union ynne ka 27 tarik da thoh ko cha ka chnat i chait i khiah wa cha u AL Hek, u montri ka chnat i chait i khiah, u Chief Operating Officer EMRI-GVK, u Deepankar Choudhury, u Director of Health Services (MI) u Dr. Aman War wow pynsñiaw yei emkaam Ambulance ha Nongtalang CHC hadien wa kyrriah ya ka nadooh u 2014 wei hadooh katni ym em 108 Ambulance ha ka thaaiñ.
Ka JSU da ong ko wa i wym em ka 108 Ambulance ha Amlarem Sub Division da wanrah i yei doohnong wa khroo ya ki paidbah ka thaaiñ khamtam wa dang boon kiwa chah ktah ha kani ka khlam.
Ka JSU War Jaiñtia Circle da kyrpaad ko leh ya u SDO ka Amlarem Sub-Division u Abhilash Baranwal wow chimkhia yeini deiwa beiñ leh ya u MLA ka thaaiñ uwa ym tip yei eh i khoo wa chem ki paidbah ha kam kini ki por.
U President ka Circle u Eddy Kerry Pohtam da ong u wa ki paidbah ka thaaiñ em ki ya i jooh i hok kam kiwi kamtæ da emkaam bha wow wan e chakri ka Ambulance sa ha ka Ri-War Jaiñtia waroh kawi.
U Treiborlang Suchen da pynrap u wa ka Sub-Division heh ko kamwa 405sqkm wei em ko 95 tylli ki chnong wa ki sarok wa sih wei ini daw pynchitom i ya ki Ambulance kawa em cha baar ka Sub Division wow wan ki ha i por wa tbian.
Ka seiñ neipor cheipor da chimkhia ko wow booddien yeini heiwa ha u Naisaphra 2018 da e dorkhat ko ha u Chief Operating Officer, GVK-EMRI, wei chwa itæ, ha u Naitung 2020 ha u montri i chait i khiah ka jylla, ha u Khonchonglad 2020 sa ha u DMHO ka West Jaiñtia Hills District tangwa hadooh katni ympu yoh ya kani ka Ambulance.
Heiyatoh wa ini waroh, ka JSU da e por ko chi tayaw wow pynpoi noh ya ka Ambulance hapoh Amlarem Sub-Division lym kamtæ ka seiñ daw leh ko yeiwa emkaam.
