Jowai: Ka KSU-South West Khasi Hills District da pynsñiaw ko yei sñiawsih hajrong i tkoh i krehkaam yong ka chnat ka chait ka khiah hapoh ka South West Khasi Hills District, heiwa na i por cha i por ki paidbah jooh ood jooh naam ki hajrong i wym biang ki thaw sumaar wa ki Doctor hapoh CHC Mawkyrwat, hadooh i duna ki wakreh katkam wa emkaam wa dawa i por, kamjooh leh i duna hadooh ki kor ki bor wa ki thaw thiah ya kiwa kjut.
Ka seiñ da ong ko wa da jooh chem ko barabor ya ki paidbah wa wan chim dawai kiwa haap wow yang da ki kynta du wow yachem Doctor wei ini da jia i leh ha ki por wa emkaam jhan ha ki Emergency Room hanlada i chitom man i iwa joor leh. Kiwa boon kiwa chong chnong ka District toh kiwa duna ka yoh ka kot wei ym ye ki u lai phah chah sumaar chadooh cha Shillong wei i wym biang kani ka thaw sumaar da wanrah ko yei eh ya kiwa kup chilliang sem chilliang wapli.
Ka seiñ da pynbaad ko wa i thut i krehkaam kani ka chnat hapoh ka District toh neidaw wym biang wot ya u khlieh wa toh u pait wa pynlai ya ka. Da jan chisnem kani ka chnat hapoh ka District ym em ko ya u District Medical & Health Officer wa pura wei ini da pyntkoh ko chiboon heiwa ya kani ka jooh ka kaam da pynsñiaw ha u montri ka chait ka khiah u A.L. Hek wa ha u Director of Health Services (MI) na i por cha i por.
Kamtæ hawa yatoh wa ym mano ka sorkar, ka seiñ da phah ko da ka khubor wa khor cha ka sorkar wow thung syndon noh da u DMHO wa pura hapoh ka District lym kamtæ ka seiñ ym yohsa ko wow chim da ka rai kawa eh.
Ka seiñ da ong ko leh wa sñiawlyngngoh ko yei slem wow pyndep yei krehkaam noh ya ka Hospital 100 tylli ki thaw thiah wot hadien 8 snem wa da wai ya u moo yurim yong ka.
Ka seiñ da e por ko chi tayaw yaka sorkar wow thung ya u DMHO wa pura hapoh ka District wei ym toh u pynslem de kawa man ka kaam yap kaam im ya ki paidbah wapli.
Ini toh katkam ka kyrwoh na u Pulljohn Wanniang, Asst. Education Secretary KSU South West Khasi Hills District.
Discussion about this post