Neidaw wa ka Positivity Rate namo kiwa yoh COVID-19 na kiwa chah Test dang em ko palat 10% ha East Khasi Hills District, kamtæ ka DC da pynmih hukum ko wow pteiñ yei pynkrehkaam ya ka Night Curfew hapoh ka District man-ka-sngi nadooh 7:00 waje i miet hadooh 5:00 waje i step wei kiwa mih wa lai ha kini ki por daw chah pynchitom ki.
Ym chah wow pynman ya kiwon kiwon ki yalang paidbah, ki yalehke Sport wa i pynman bia.
Ym chah wow lai na kawi ka District cha kawi wa na sor Shillong cha kiwi ki thaw lait noh kitu kiwa da yoh bor wei kiwa lai khlem yoh Pass daw chah pynchitom ki.
Ki yung krehkaam ka sorkar pyrdi wa ki yong ka sorkar jylla u wai ki katkam ka hukum wa da dep pynmih da ka Home (Political) Department wa ka Personnel & AR (A) Department.
Waroh ki Bank wa ki Post Office u wai ki deiwa pynduna ya ki bru wakreh. Ki Bank toh u khang ki chwa ka 4:00 waje i sngi katwa ki Post Office won chwa ka 2:00 waje i sngi.
Lada em i yap bru, u chah wow em 10 ngut ki bru ha ki yalang deiwa yohbor na ka DC.
Ki kaam rep wa ki kaam ka MGNREGA toh kiwa chah u leh.
I khayi khappood wa kiwi ki ri toh u pynbait da ka da ki Sub Divisional Officers (C) deiwa yohbor na ka DC.
Ki yung krehkaam ki bru samen wa ki thaw puræ lada emkaam ki wow wai ya ki kaam wa jhan, ye ki wow paan bor na ka DC wei daw e bor katkam wa emkaam.
Daw pait hadooh katwon boon lane duna kiwa dang yoh COVID-19 ha kani ka tayaw wei lada pteiñ i ku kiwa yoh, daw pynrkhiñ chooh chooh ya ki kyndon.
Ki kaam wa chah u leh toh kiwa yatoh ya i chait i khiah, i lai e tika, i kit ya ki marbaam, ki dawai dachin, kiwa lai yei kaam sorkar nadooh ki pulit, ki Home Guard, ki kaam bordiñ, ki kaam pynpoi umkor, i saam baam rachon, i lai booh tadong LPG, ki kaam wa yatoh wa i ri mrad wa kiwi ki kaam wa kam kini ki jait.
