Ka High Court ka Meghalaya da chong bichaar biang ko ya ka mukotduma wa yatoh wa i tih mooyong pyrchah ya ka aiñ hapoh ka jylla ynnin ka sngi heiwa ka sorkar leh da e ko yei jubab kammon wow kit ya u mooyong wei wow dai lilam noh ya u mooyong wa da dep tih deiwa kheiñ hadooh katwon em u mooyong wa dang sah.
Neiliang ka sorkar da ong ko wa u pyndep wow leh yeini chwa u kut u 2023.
Ka yung bichaar da yooluti ko wa daw ye u pyndep smat yeini wei ka Coal India Limited deilang waka MSCTC Ltd toh u lai pyntip ki cha u Justice Katakey lada ym ye ka sorkar wow leh yei kaam yong ka kamjooh lada ym ye wow pyndep hapoh i por wa da booh.
Ka High Court da klam ko leh yei slem i yoh License wow tih mooyong hanla da em boon kiwa yaleh wei kiwa tih mooyong pyrchah ya ka aiñ leh dang pteiñ ki wot hadien ki hukum wa da pynmih da ka NGT, ka Supreme Court kamjooh ka High Court deiwa kdaw yei maa i rukom tih mooyong Rat-Hole Mining khamtam ha ki liang mihsngi ka jylla.
Da ong leh wa da sñiaw yei em kiwa kit ya u mooyong wa da tih pyrchah ya ka aiñ napoh ka jylla cha baar jylla dep te pynpsiah biang oo chapoh ka jylla yow chalan cha baar ri deiwa chna thok ya ki kot ki sla yong kiwi ki jylla neibynta uni u mooyong wa mih napoh ka jylla hi.
Chooh chooh da kdaw leh wa u mooyong ka jylla da chalan cha kiwi ki jylla da ki Truck wa em ya u Number ka jylla Nagaland tangwa ki kot ki sla won pynyoo toh uwa wan kiwi kiwi ki jylla ka thaaiñ mihsngi.
Kamtæ da ong wa ym toh u yoo phylla wa i rood u sarokbah ka Goalpara District ka Assam ha ki bynta nadooh Dudhnoi hadooh Krishnai toh uwa dap da u mooyong wa em wa pynhaap hadooh wa da wiar ki lyngkha. Ini da chem leh sa ha ki le tylli ki sarok hapyrdi ka Dudhnoi wa Krishnai kiwa lai cha Meghalaya heiwa ar tylli toh na North Garo Hills District wa uwi na Paikan uwa lai cha Tura.
Ka High Court da ong ko wa u Chief Secretary wa u Director General of Police toh u kitkhlieh ki lada dang em iwon iwon i tih mooyong pyrchah ya ka aiñ wei chi troh leh ym toh u yoh u lai luti u kit da kiwon kiwon ki jait kari.
Ki SP ki District daw kheiñ wa tyngkheiñ ki ya ka hukum ka yung bichaar lada chem ya u mooyong wa tih pyrchah ya ka aiñ.
U Chief Secretary wa u DGP wa waroh ki pulit toh u bood ki thih ya ka hukum wei ym toh u pyndem ki ha iwon iwon i tuklar da kiwa em hei bor.
Ya kani ka mukotduma daw bichaar biang ha ka 09-11-22 wei da yooluti wa u Chief Secretary wa u DGP daw ye ki u wow pyndooh pyndam noh ya waroh ki kaam wa pyrchah aiñ heiyatoh wa i tih mooyong hapoh ka jylla.
