Ka JSU Laskein Block Circle ynne ka sngi da lai pait ko ya ka Laskein CHC heiyatoh wa i pynkhreh ya ki tiar ki tar wow sumaar ya kiwa chah ktah ha u COVID-19.
Ha ini u lai pait da yahkhmat da u President ka seiñ, u Dapmain Suchiang ryngkat wa u Franky Shylla, General Secretary wa ki dkhot ka seiñ.
Hawa yaklam wa ka Doctor In-charge ka Laskein CHC, kawa da pyntip wa i pynkhreh da lai i chaphrang heiwa ki dawai da man ki kiwa da biang wei wot ki Oxygen Concentrator da yoh dang du kamwa 5 tylli kamjooh leh ki sula yada PPE leh du kattu katni tylli donhi.
Ka seiñ da phylla ko wow chem wa kat ka Laskein CHC kawa pait ya ki phaw tylli ki chnong tangwa em du kawi ka thaw thiah wa kyrpang namo ki Isolation Ward deiwa kyntu ya ka chnat wow pynboon chooh chooh ya ki thawthiah wa kyrpang deiwa pynbiang leh ya ki Oxygen Concentrator wa ki dawai dachin.
Ka seiñ da yoh ujor ko leh na ki paidbah wa boon khamtam na kiwa hayung hasem ki manbei kiwa wan kha khon ha kani ka thaw sumaar wa da chem chitom ki wa ym biang ka bordiñ neidaw wam em ka kor Generator ha kani ka CHC iwa da booh hei eh i khoo ya ki paidbah.
Ka seiñ da beiñ ko leh ya ka chnat i chait i khiah wa ka sorkar jylla kawa kheiñstiñ khlem pyrkhat de ya kiwa dooh khamtam kiwa sah cha palatsor.
Heijooh i por ka seiñ da dawa ko na ka sorkar wow pynbiang wut-wut ya iwa emkaam ha kani ka thaw sumaar khnang wow yoh myntoi ki paidbah wa boon wa lang.
