Ka 6th Meghalaya Games 2025 kawa daw pynman ha Jowai wa kiwi de ki chnong wa em ha West Jaiñtia Hills District, da lai bait i pynkhreh wow pynman ka heiwa ha uni u snem daw em 25 tylli ki jait yalehke tangwa ar tylli kitæ ka Swimming wa ka Golf da hap wow rah cha Shillong.
Kiwa chimbynta da antaad wow em ki palat 4000 ngut kiwa daw wan hiar na kylleiñ ka jylla.
Kawi na ka thaw ha Jowai wa daw pynman ya ki yakob toh ha Lion Mission Compound Dorbar Chnong kawa tip leh kam ka Pohskur heiwa da sakhi ya iwa boon ki myntoi wa da yoh ko.
Ha Pohskur daw pynman ya ka Arm Wrestling hapoh ka Auditorium Hall, ka Wushu hapoh ka yung skur ka Jowai Presbyterian Lower Primary School deilang ka Volleyball ha Madan Biar.
Yow pynkhreh wow pynman ya kini, katkam wa pyntip u Daunihiwot Synrem, EC Member ka Lion Mission Compound Dorbar Chnong, da ong u wa da boon bha ki myntoi wa da yoh ki wei kawi toh wow loor pynmadan ya ka Madan Biar neibhah nachwa toh kawa at wei kawa em thlu leh wei da pynchna leh ya u nala wa lai napoh kani ka madan uwa da em nachwa tangwa da oor noh u wei heipor wa slap da sahkut u iwa da pynman ya ka um wow lai ko cha ki yung ki sem ki bru iwa da pynsaja ya ki bru wei kattu deiwa wan ka Meghalaya Games daw lait noh na ini.
Heiyatoh wa ka Auditorium Hall da ong u wa chwa u wan ka Meghalaya Games, ym pu em niaam rong wei ka bordiñ leh toh kawa pyndait chipor donhi tangwa kattæ won i rong dadep niaam chajrong wa chapoh wei ka bordiñ leh da yoh da kawa pura.
Da pyntip u leh wa em leh ki bynta wa nachwa heipor wa slap, ka um psiah ko chapoh ka Auditorium Hall wei yeini leh da ye wow tymmoh wow pynchna yow lait ka um u kooid u psiah chapoh.
Kamtæ da ong u wa hadien wa dep u pynman ya ka Meghalaya Games hapoh ka West Jaiñtia Hills ymtip de mynnu u wan biang ko tangwa iwa da ieh ko chadien wei i myntoi ka chnong man ko kawa daw neh wei ka parom wow hiar pateiñ yow khana yei myntoi wa da yoh.
Discussion about this post