Jowai: Chibynta yong ka lehniam Behdieñkhlam ka Raij Jowai, ki khon ka Niamtre kiwa chong wa sah ha Ummulong hapoh i yahkhmat ka Seiñraij Ummulong kamwa jooh leh man la u snem ynne ka sngi Mulong da lai li thooh ki ya ka Dieñkhlam yong ki.
Ki khon ka Niamtre ha Ummulong toh kiwa mih na Jowai wow lai chong chnong ha Ummulong na ki por warim wei ki leh pyndep ki ya ka lehniam Behdieñkhlam kamwa leh ha Jowai heiwa ynnin ka Pynsiñ da pyndep ki ya ka Siang ka Pha.
Ynne heipor chiteiñ sngi da mih ki khon chynrang ka Seiñraij Ummulong wow lai thyllem ya ka Dieñkhlam na iwi i khloo wa tip kam i Khloo Sorkar wa em ha khappood ka chnong Moodymmai wa Mookyndur wow thyllem ya ka Dieñkhlam.
Manda poi ha kani ka thaw hachwa wow thyllem ya ka Dieñkhlam da e ya ka suit ka choor wow e ngooh ya ka Bei Rymaw kamjooh ki Blai ki Syiem wei wow paan yei kyrkhu kyrdoh. Neibynta ka Dieñkhlam (heh) da e ya ki kyntien e ngooh da u Danny Shylla, ya ka Dieñ Kyndit won da u Ram Shylla.
Hadien wa da thyllem da rah ya ka Dieñkhlam wa ka Dieñ Kyndit ha iwi i thaw wa rap madan wa em harood u sarokbah NH 44 yow tah wei wow pteiñ ya ka Dieñkhlam wei da rah won ya ka cha madan Wahseiñkhoh, Ummulong. Ha Wahseiñkhoh nawon manda dep pynthiah ya ka da e ya ka ngooh ka dem da u Seinbor Rymbai.
Da pyntip wa mynstep ya kani ka Dieñkhlam daw rah cha Madan Kuwang, wa em ka Community Hall ka chnong Ummulong hei wow pynyieñ ya ka, i wow pynbood won da i Chaad Yung heiwa daw lai e ngooh e dem ha waroh ki yung ki khon ka Niamtre wa em ha Ummulong.
Ha ka 3 tarik nawon ka Seiñraij Ummulong daw wanrah ki ya i rot namo i rong cha Jowai wow pynhiar ki ha Aitnar chirup wa kiwi ki ki chnong wa ki dong ki kyntoit ka Jowai kamjooh wa ka Seiñraij Shillong.
Discussion about this post