Uwa yaleh RTI na East Jaiñtia Hills, u Reachingson Siangshai ha ka 12 tarik uni u bnai da lai booddien biang u ya ka RTI ha Deputy Commissioner Office, kawa da booh nadooh ka 31 tarik u July, 2025 heiyatoh wa i rukom thung kaam thung jaam wa i rukom krehkaam yong ka District Selection Committee (DSC) hapoh ka East Jaintia Hills District.
Ya kani ka RTI ym pu em yoh jubab hadooh kattæ leh na u PIO kawa da toh u yoh ha ka sngi kut u August wei ha ka 1 tarik uni u bnai hawa lai booddien yeini da khyrngiat u Reachingson wow tip na u PIO wym tip u chaphang kani ka RTI wei da phah kylli na ka Dealing Assistant kawa da phah won ya oo wow yachem wa u DC heiwa u Reachingson ym bien u wow lai yachem wa u DC neibhah wym toh u PIO næ u bru wa toh u pait yeini i kaam.
Hadien ini won da khut ya u Reachingson wow wan pait u yei jubab RTI heiwa da lai u ha ka 4 tarik heiwa u da chem u wa i jubab ym pu em biang i wei hawa kwah u wow yachem wa u PIO hajrong ini ym em u wei hadien ini da lai mih u man-ka-sngi tangwa ym em u hapoh yung krehkaam u.
Kamtæ ha ka 12 tarik da lai lang wa ki seiñbhalang yow lai yachem wa u PIO tangwa ym em biang u.
Hadien ini da lai won wow yachem wa u DC yow kylli yei daw wa slem wow jubab ya kani ka RTI tangwa u DC leh da kyntait u wow yachem wei da pyntip cha ki da u Peon wow wan won ha ka sngi Monday khlem da e daw yei wym bien u yachem.
U Reachingson da ong u wa da pyntip cha oo wa uni u PIO da chim chuti u neidaw wa chitom u tangwa ki bru yoo ki wa lai tlep bru u hapyrdi ka sngi wa chit wei man u uwa chait wa khiah wei ini waroh da pynsuba wa em iyi ræ wa pyrchang wow murieh heiyatoh wa ini i kaam.
Discussion about this post