Ka sorkar Meghalaya da rai ko wow bahkhlieh noh u su ya ka tulop kiwa kreh ki le tylli ki District Council wa kynthup nadooh ka Khasi Hills Autonomous District Council (KHADC), ka Jaiñtia Hills Autonomous District Council (JHADC) wa ka Garo Hills Autonomous District Council (GHADC) deiwa sdang na u Khonchonglad (Nov) 2025.
U Chief Minister ka jylla, u Conrad K. Sangma da pynbna u yeini u ynne kam chibynta wow pynkhlan ya ki Autonomous District Councils (ADC) kiwa man chibynta wow pynneh pynsah yei man kyrpang ki jaitbru ka jylla.
U Conrad da ong u wa ka sorkar da rai ko wa nadooh u Khonchonglad 2025 ter ter wow chimkti noh u su ya ka tulop neibhah chisien wa ka sorkar u su ko ya ka tulop kiwa kreh, ki ADC daw ye ki wow pynkhlan ya ki kaamram yong ki khlem da hap de wow pyrkhat ya ka tulop.
Chooh chooh da pyntip u wa daw chna ya ka Committee wow yoh ya ka Report wa che hapoh 45 sngi deiwa kular wa ka sorkar u bahkhlieh ko u su ya ka tulop deiwa pyntikna wym pynthut ka sorkar jylla yei rukom krehkaam wa laitlooid ki ADC.
U Conrad da ong u wa da batai u leh ya u Lat hajrong ini i kaam wei i rai wa khaddooh daw chim da ka Cabinet namo da ka dhab ki Montri sorkar mynstep.
Da pyntip u leh wa du neibynta ka GHADC ka tulop dapoi ko palat Rs. 70 klur ha chi snem tangwa iwa ye ko wow pynmih ym poi tang Rs. 30 klur leh wei ini leh da sariem ko ha kiwi ki ADC kam ha JHADC wa kattu katni ha ka KHADC.
Discussion about this post