Haka yalang wa da khut daka Dorbar Chnong Tympang Iawmusiang, Jowai ynnin ka 13 tarik heiyatoh wei khooid i jngiar ka Iawmusiang kawa man i durkhmat ka Jowai, da wan ya chimbynta da ki Waheh Chnong ka thaaiñ Jowai heiwa da wan hadooh 23 ngut ki Waheh Chnong kiwa da ya chimbynta wow e yumut ya kiwa boon iwa emkaam yow khooid yow jngiar ka Iawmusiang kawa man kam u klongsnam ka ri-loom Jaiñtia.
Da rai wow em i ya krehlang da waroh ki chnong ka thaaiñ Jowai wow wanrah ya i khooid i suba heiwa da mynjur wow pynrkhiñ bha neini chakhmat wow pynchitom deiwa eh ya kiwa noh taroi yaki jhep. Kamjooh wow kyntu yaka Jowai Municipal Board wa ya ka District Administration wow rap pyntikna ya i rukom pyllang jhep.
Da rai leh wa emkaam toh u sikai yaki bru wow man ki kiwa lehkhooid deiwa sdang na yung wei kamjooh cha lait. U tip u pynyait ya ki jhep kam kiwa ye u pyut wa kiwa ym ye u pyut, deiwa e yumut leh cha ka sorkar wa toh u thooh laad u pynbiang yaki thaw chong dai madan lane ki Vending Zone neibhah kiwa chong dai madan wa katkam wa da yaklam da waroh ki Waheh Chnong iwa boon hi i jhep mih ki na kiwa chong dai madan kiwa man ka janmiet man da toh i por liwan ki tæ noh pyllup ki ya ki jhoor ki jhep pyn ha i jooh i thaw wa chong dai ki.
Sa iwi toh wa emkaam yaki Market Committee næ ki seiñ yaw kam ka Sein Raij Jowai, ka CNI wa ka Iaw Chyiap da toh u pynbiang ki jar jiar ki thaw pyllang jhep kiwa biang.
Khaddooh neiliang ka Tympang Iawmusiang Jowai leh da mynjur ko wa daw booh ko kamwa 3 ngut ki bru wow pyllang wow jied yaki Plastic næ ki jhep ha u sarok wa nadooh DC Office hadooh Police Point wei kamjooh leh ki Street Angels ki wow sikai yaki bru khamtam ya kitu kiwa na palat chnong ka Jowai ya i emkaam i khooid i jngiar hapoh chnong poh thaw.
Ka yalang da man ko kawa jop heiwa 90% ki Waheh Chnong da wan ki, deilang wa ki yumut wa sñiaw myntoi yaka jaitbru, khamtam heini i por wa ktah u COVID-19.
