Ynne ka sngi kiwa ngait niam Hindu ha Jowai da chimbynta ki hei wow wai yaka Ram Mandir ha Ayodhya, Uttar Pradesh wei ya ini da pynman ha Shiv Mandir Complex, Iawmusiang.
Ya kani ka lehniam wa i lehkmen waroh ha Jowai da pynlai da ka Vishva Hindu Parishad (VHP) Jowai.
Ha ini i Mandir da pynriam yaka luti wei da chna dara ha lait wei da booh yaka TV wa pynyoo ya i wai yaka Ram Mandir ha Ayodhya.
Hapoh Mandir da em kiwa ngoohblai, kiwa biah tika, kiwa kdoh tylle Puja ha rdang kti, wei hapoh Mandir leh da booh leh yaka TV neibynta kiwa chah khut sñiawbha wa kiwi kiwa ngait niam wow sakhi ki yei wai yaka Ram Mandir.
Manda dep wai yaka Ram Mandir da saam ya ki Prasad wei kamjooh da e baam ya kiwa wan chimbynta ha Shiv Mandir.
Hawa yaklam wa u Bholak Kumar Gupta, Secretary ka VHP, Jowai da ong u wa da man ka sngi wa sahkynmoo neibhah wa da yoh u wai yaka Ram Mandir hadien 500 snem.
Da khana u leh yaka parom wa 500 snem nachwa jooh em ka Ram Mandir tangwa da chna noh da ka Masjid hajrong yong ka da ki syiem Mughal wei ynne da yoh biang u wai ya kani ka Mandir wei man ko ka sngi wow sahkynmoo ya waroh.
Da e khublei u ya ki bor chnong ka Iawmusiang wa da e bor wow pynman ya kani ka lehkmen, ki waheh ka Seiñraij Jowai, ki sahep sorkar ka District wa kiwi kiwi kiwa da embynta ha kani ka lehniam.
Discussion about this post