Ynne ka sngi ki dkhot ka Voice of the People (VPP) Khliehriat Circle chirup wa ki bru samen wa ki khynroo khyllood ka Khliehriat Constituency deilang waka Sutnga Saipung Constituency da mih paidbah ki wow chong kyllaiñ myngngor haphrang u mot u Kiang Nangbah wa em ha pchem ka yung krehkaam u Deputy Commissioner, Khliehriat kam ka dak wow kyrchaan ya u heh ka VPP u Ardent Basaiawmoit uwa chah thngan wow yakhun pynkylla noh ya ka bhah thung kreh namo ka Reservation Policy wow pynkylla noh katkam i dawa i por.
U heh ka VPP na East Jaiñtia Hills District, u Damewanhi Rymbai hawa e yei klam da ong u wa lada u Ardent tlot i doh i pran u i yakhih, daw man i iwa dang joor ha ka jylla ha ki sngi wow wan deiwa pynrap leh wa lada jia katwa jia kani ka mat Reservation Policy toh u lai ko chaphrang hadooh wa da poi ka thong i jop katkam i thrang wa i angnood ki paidbah wa ki heh ka VPP na Ri-loom Jaiñtia.
Da kyntu u leh ya ka sorkar wow bichaar bniah ya ini i kaam wei ya katni i yakhih dang man iwa jai-jai wei kat dang lai i por u man iwa khor neibhah wa ki khynroo khyllood katni dang chrai ki kat dang lai ki sngi wei ini i yakhih toh katkam i dawa yei hok yong ki.
Heijooh i por da ong u wa ki paidbah ka East Jaiñtia Hills ymtoh wow em ki yei sñiaw yaphær Party tang wow mih chaphrang wow dawa yei hok yong ki wow kyrchaan ya ini i dawa wow dawa pynkylla ya ka pyrla wa khia chiliang.
Ka Publicity Secretary ka STIEH, ka Deiwi Tongper da sñiaw ko wa kani toh ka kynti wow dawa pynkylla ya ka Reservation Policy deiwa bichaar salonsar deiwa ong leh wa ymtoh wa yoo sih ya ki jaitbru Garo tangwa dawa ko yei hok neibhah lada wyrchaw em ar tylli ki District Council wa yoh bhah 40% wei kini ki Council man kiwa boon paaid dooh lada nujor wa kiwi ki jaitbru.
Kiwi kiwa da klam ha kani ka sngi toh u President ka Federation of Khasi Jaiñtia and Garo People-East Jaiñtia Hills District, u Michal Chyrmang, u President ka Jaiñtia National Council, u Wanshwa Suting, ka President ka HANM Women’s Wing, ka Bythygrace Dkhar wa kiwi kiwi.
