Kam chibynta i lehkmen yei dap 75 snem i yoh laitlooid ka ri India iwa da e pyrtuid “Azadi ka Amrit Mahotsav”, ynne da pynman ya ka yalang wa kiwa yoh myntoi na ki Scheme ka sorkar pyrdi, heiwa u Prime Minister ka ri, u Narendra Modi lyngba ka Internet da yaklam u waka ri waroh kawi na Shimla, Himachal Pradesh.
I thong kani ka yalang toh yow yaklam kammon wa kitu ki wym pu em yoh myntoi yow lait ki u chah ieh, yow sñiawthooh kammon da pynsuk na kiwa boon ki Scheme, yow yoh buit kammon wow pynbha pynmiat ya kini ki Scheme wei kammon leh u pynkrehkaam lang ki wa i angnood kiwa chong chnong yei dap 100 snem ka ri ha u 2047.
Ha Meghalaya da chimbynta ha kani ka yalang ha State Convention Centre Auditorium, Shillong heiwa da emlang u Prestone Tynsong, Deputy Chief Minister kam u kongsan, u Hamletson Dohling, Minister C&RD wa u B L Verma, Mongtri Khynnah ka DoNER.
Hawa e yei klam, u Prestone Tynsong da kdaw u ya ki kaam wa da wanrah da ka sorkar pyrdi wa ki myntoi wa da yoh ki paidbah khamtam kitu kiwa dooh wa duk. Da ong u leh wa i e yarap khlem sangeh da ka sorkar pyrdi da yoh chiboon ki kaam pynroi kiwa da pynkylla dur ya ka jylla ha ki kajiak snem wa da lai.
Da pynsñiaw u leh yei sñiawngooh neibynta ka sorkar jylla deiwa yooluti ya kiwi ki Scheme ha kini ki snem wa daw wan.
Ha kani ka yalang, u B L Verma da yaklam u wa kiwa yoh myntoi hapoh ka jylla na ki Scheme ka sorkar pyrdi.
