Shillong: U montri rangbah ka jylla, u Conrad K Sangma, ynne da chimbynta u ha ka Sustainable Mountain Development Summit VIII ha NEC Auditorium, Nongrim Hills, Shillong kam u kongsan wei ya kani ka summit namo ka yalang u pynman nadooh ynne hadooh ka 6 tarik uni u bnai.
U Conrad hawa e yei klam da ekhublei u ya ka Integrated Mountain Initiative (IMI), Integrated Mountain Development Initiative (MIMDI), Shillong wa kiwi kiwi kiwa da pynman ya ka summit ha Meghalaya deiwa ong da toh u pynkrehkaam ya ki buit ki budia wa ki rukom krehkaam.
Da ong u wa ka pyrthai daw kylla ko ha ki 10-15 snem ha ki ar bynta, kawi toh ka Technology kawa kreh katkam ka Artificial Intelligence wa ka Climate Change, deiwa pynrap wa ini i kylla daw wanrah i yei thut i wit wa daw wailaad i leh ha kiwa boon ki liang.
Da ong u leh wa waroh toh u man ki kiwa pdiang ya kini ki kylla wei wow chim kabu ya ki.
Chooh chooh u Conrad da ong u leh wa emkaam wow kyrchaan wei wow tipmit ya ki bru samen kiwa sdang u seiñ dei yong ki hi khih i kreh. Da ong u leh wa ka sorkar ha ki bnai wow wan daw pynman ko ya ka Meghalaya Secretariat kam ka Net Zero Waste Area.
Ka SMDS-VIII toh kawa da pynman hajrong ki yalang warim kiwa la 7 sien heiwa da klam hajrong i kylla i man i long i suiñ bneiñ, ki khloo, i rep i riang, ka um, i chah ktah ha ka rymaw, wa kiwi kiwi.
Ka phang pyrdi yong ka SDMS VIII toh ka ‘Sustainable Mountain Initiatives for Livelihoods and Entrepreneurship for Youth (SMILEY) chirup wa kiwi ki phang khian wa yatoh wa ki thaaiñ ri-loom wa ki bru wa sah ha kini ki thaaiñ.
Discussion about this post