Ynne ka sngi u montri rangbah ka jylla, u Conrad Sangma da chimbynta u ha ka yalang wa pyllai da u montri ki kaam pohyung ka ri, u Amit Shah wa u montri ka sorkar pyrdi wa pait ya ka chnat Tourism and Culture, u Kishan Reddy heiwa da yaklam hajrong i thmu wow sdang ya ka program wa tip kam ka ‘Har Ghar Tiranga’ iwa mut ha waroh ki manyung u pynhær ki ya ka lama ka ri India.
Kam wow kdaw heini ka lama ka ri man ko kam ka dak i sñiawsarong ya waroh wei u montri ki kaam pohyung, u Amit Shah uwa pait leh ya i lehkmen laitlooid wa 75 snem ka ri namo ka Azadi Ka Amrit Mahotsav da pdiang u ya ka program ‘Har Ghar Tiranga’.
Neiliang ka Ministry of Culture ka ri da booh thong ko wow kynjoh hadooh 20 klur tylli ki manyung hapoh ka ri chwa ka 15 Naisaphra 2022 heiwa ha kani ka sngi daw pynhær ya ka lama ka ri wei u sdang ya kani ka program ha uni u bnai.
Hapoh kani ka program waroh ki paidbah ka ri ye ki wow pynhær ya ka lama le rong ka ri ha ka sngi laitlooid ka ri.
I thmu yong kani ka program toh wow pynsñiawthooh ya waroh hajrong i mut ka lama ka ri, ki kyndon wa ki aiñ wa yatoh wa ka, wow lait u bakla u pynhær ya ka wa kiwi kiwi.
Heiyatoh wa ini, ka Meghalaya da phah thied ko 6.80 lak tylli ki lama yow booh ha waroh ki chnat sorkar wei da phah leh ya ki DC wow sdang ki ya kani ka Har Ghar Tiranga deiwa pynjoor nadooh ka 22 tarik uni u bnai deiwa chimbynta waroh kiwa emkti heini.
