Hajrong ka thong wow wanrah i sñiaw maya, i yajooh yajan wei pynneh pynsah ya ka niam, rukom, dustur, riti wa pynjooh sikai ki warim yong ki jaitbru Tiwa wa em ha Karbi Anglong. U Pa Dolloi ka Elaka Jowai u waheh Puramon Kynjin ha ka 10 tarik Thohlakhmi da yoohkjat u ha chnong Bormarjong, West Karbi Anglong, Assam hei wow sakhilang kam u kongsan ya ka 1st Annual Conference of Tiwa Loro Daloi Meet.
Heini i yoohkjat u Pa Dolloi hapoh kani ka chnong, ki paaid waboon walang yong kani ka jaitbru Tiwa na kyllieñ ki chnong ki thaw nadooh ki khian hadooh ki waheh, ki manbei, khynroo khyllood dawan ki wow sakhilang wei wow pdiang burom yow Pa Dolloi dei sñiaw maya hapyrdi i pynyoo yei man kyrpang ka jaitbru nadooh i riam i bait, i kup i sem hadooh i chaad i kmen, i rwai i siaw i put i tem.
Kani toh ka yachemlang wada pynman da ka Tiwa Indigenous Protection Organization (Tiwa Shithungkhorya Akural Chomot) wei ha ka yalang yong kani ka sngi hei pynlai u Baleswar Pumah, President TIPO da yoh i klam i kappe na ki waheh wasian kani ka jaitbru Tiwa kamjooh leh na u Pa Dolloi waheh Puramon Kynjin wa man leh kam u kongsan yong kani ka sngi.
U Pa Dolloi hei klam i kappe da ong u, dap dei sñiawsuk sñiawkmen wow embyntalang hapoh kani ka chnong, kawa em ya kitæ ki bru kiwa thrang angnood u pynneh pynsah yei man kyrpang ka jaitbru kawa dang bood dang ksooh yei tre i thied ka niam, ka rukom, dustur wa da yoh pateiñ na ki warim wajah wei da e mynsien u leh ya kiwa yahkhmat ka seiñ Tiwa wow imsngi chooh chooh ki u pynjanai ya kani ka sngi na ki snem cha ki snem da ka luti yong i maya, i yatylli wei burom kylliang.
