Shillong: Deilang waka ri waroh kawi, yaka National Press Day 2020 da lehkmen yaka ynne ka sngi ha Shillong hajrong ka phang “Role of Media During the COVID-19 Pandemic and its Impact on Media”.
Yaka yalang da pynman daka Shillong Press Club deiwa kyrchaan ka Directorate of Information and Public Relations, Meghalaya heiwa u James P. K. Sangma, Minister of Information and Public Relations da embynta lang u kam u kongsan.
Da emlang leh ka M. War Nongbri, Secretary, Information and Public Relations Department, u B.S. Sohliya, Director, Information and Public Relations, u R.M. Shabong, President, Meghalaya Editors and Publishers Association, u David Laitphlang, President, Shillong Press Club, Dr. Chayanika Sarma, Consultant Psychiatrist, Supercare Hospital, Shillong deilang wa kiwa thoh khubor.
U kongsan uwa em ha New Delhi, da chimbynta u lyngba ka Internet uwa da ong wa i em ki laad pathai khubor wa laitlooid man ko kawi na kiwa embynta wa emkaam bha ha kiwon kiwon ki jait sorkar deiwa leh ki yei kaam yong ki wow e yutip, u sikai yow yoh leh yei roi i paar wa neh wa i yatylli ka imlang sahlang. “Na ini i daw da tip yaka kam u paya wa soo ka synchaar paidbah”, da ong u Sangma.
Deiwa yaroh wei e khublei ya iwa boon wa da yarap wa da e ki laad pathai khubor khamtam ha kini ki por yow e yaka yutip wa tikna cha ki paidbah deiwa booh hei maa ya idæ wa em kani ka khlam, u Sangma da ban u leh yeiwa emkaam yaki laad puthai khubor wow e yaka yutip kawa biang wa tikna heiyatoh waka khlam COVID-19.
Da ong u leh wa ka sorkar da ngait bait ko wa ki laad pathai khubor toh ka lok wow wanrah yei kitkhlieh yaka sorkar yow chakri paidbah yow wanrah yaka roi ka paar wa em leh yei bahkhlieh, kamtæ u Sangma da kyntu u yaki laad pathai khubor wow bood ya i kyrdan rukom kreh wa miat tam yow wanrah leh yei yaroh.
Kiwi de kiwa klam toh ka M. War Nongbri, u B.S. Sohliya, u David Laitphlang wa Dr. Chayanika Sarma.
Hadien ini, kiwa thoh khubor da chimbynta ki haka Webinar wa pynman daka Press Council of India, New Delhi hajrong ka phang “Role of Media During the COVID-19 Pandemic and its Impact on Media” wa pynman ha New Delhi.
