Jowai: Kiwa chong chnong kawi ka kyntoit yong ka Iawmusiang Jowai, kawa tip kam ka Wahiawchor kawa em nadien ka yungkrehkaam u Deputy Commissioner ka WJH, ka da maad ko yei smatung paikhana waroh chi kattu na i daw i pyntooid ya ka um wa ki jakhlai paikhana wa kiwi de ki jakhlia na ki bynta waphær yong ka Iawmusiang cha kani ka kyntoit.
Heiyatoh wa ini, ki tre yung kani ka kyntoit da pyntip ki cha ka seiñ All Hynniewtrep People United Front (AHPUF), kawa ynne ka sngi da lai sylli ha i yahkhmat u John Phawa, President wa u Chandame Sungoh, General Secretary wei da chem ya i tooid yong ki um wa ki jakhlia paikhana na ki paikhana yong ka Sein Raij Jowai, na Jowai Police Station (Police Quarter), na ki thaaiñ yong ka SBI, Iawmusiang Yaw Chor, Jowai wa kiwi de ki tngit cha ki nala wa ki luti syngkeiñ yong kani ka kyntoit. Ka seiñ da chem ko wa ini da jia nei wym chimkhia wei leh khlem akor ki tre paikhana wow pyntooid bait ya ki jakhlai paikhana khlem da pyrkhat de ya ki bru kiwa sah ha kani ka kyntoit khlem da booh leh ya ki Septic Tank wei ki Pipe wow pynlai ya ka um paikhana toh kiwa da sih wa da pai lut kiwa ym em pynchna de.
Hawa yaklam wa kiwa pathai khubor wa ki tre yung kani ka kyntoit kiwa kynthup ya ka Thilomina Sutnga, u Skhem Thubru wa kiwi de, ka Thilomina da ong ko wa neiliang yong ki da wan ujor ya kani ka kaam cha ka yung krehkaam ka Town Planner Jowai, tangwa ym em leh ki iyi iyi leh kamjooh cha ka Jowai Municipal Board (JMB) heiyatoh wa i jakhlia wei da su ki leh ya ka bai Municipal kawa T. 100 man ka bnai na kawi pa kawi ka manyung tangwa ka truck kit jhep ka JMB ym jooh em wan ko cha kani ka kyntoit yow kit yei jhep.
Neiliang ka AHPUF ka da dep ujor ko ya ini cha u Waheh Chnong ka Iawmusiang u Embhahlang Khyriem, cha u Secretary ka Sein Raij Jowai u Arwotki Sumer, cha u DC ka West Jaiñtia District u Chinmay Pundlikrao Gotmare, cha u OC ka Jowai PS wa cha u CEO ka Jowai Municipal Board.
Neiliang kini ki yung krehkaam waphær waphær da kular ki wow leh ya iwa emkaam wei ka seiñ da e por ko chi bnai wow leh ki ya iwa emkaam yow pynsangeh i tooid i jakhlia cha kani ka kyntoit neibhah ktah ko ya i chait i khiah ki bru kani ka kyntiot wei da pyn sihdur ko leh ya ka chnong Jowai waroh kawi.
Discussion about this post