Shillong: Ka seiñ Jaiñtia Students Union-1 Shillong Circle da pyntip ko wa katkam ka ujor wa yoh ko na ki arngut ki kynthai, ka wi na Mawlai Iewrynghep, East Khasi Hills wa kawi na Rymbai, East Jaiñtia Hills da ong wa kini ki arngut da chah pyndooh kreh ki khlem daw ha kawi ka Buzzyear Education Pvt. Ltd. kawa pait ya ka SSA.
Katkam i pyntip kitai ki arngut da ong ki wa ha ka 8 tarik uni u bnai dang lai kreh ki wei ha ka tai ka janmiet u In-charge yong katai ka Company ym em ong u ya ki wa da chah pyndam kreh ki wei da kylli donhi u wa lada dang em ki tiar ki tar ka Company wa ki. Kamtæ kini ki arngut da ki kylli ki da chah beh kreh ki mo? wei da jubab u wa ymtip u yei daw wei daw phone u HR u Mahammad Shamshad Ali uwa em ha Delhi ya ki.
Ha ka 9 tarik kini ki arngut da phone ki cha Delhi wei da pyntip ha u HR uwa ong wa ujor u In-charge pyrchah ya ki, hadien ini da kylli biang ki ya u In-charge uwa ong wa ym em ujor u pyrchah ya ki.
Ka seiñ da wan yachem ko wa u In-charge yong katai ka Company u Ajir Swaroop ynne ka 16 tarik hei emlang u General Secretary JSU-1 Shillong Circle u Robert S. Nongtdu deilang wa ki dkhot yong ka ha kamra krehkaam hei emlang kiwa chah beh kaam.
U In-charge da ong u wa dadep pyntip cha kini ki arngut lyngba ka e-mail wa chah beh kreh ki, neiliang yong ki won da ong ki wa ym em yoh ki ya ka e-mail.
Iwa sñiawphylla won wa kini ki arngut da thung kreh ya ki da ka contract wa ong u kreh ki arsnem. Ini i leh kani ka Company pynyoo wa ym em burom ki yei hok ki tre ri da ong ka seiñ. Hadien wa ka seiñ da kylli boon ki phang kylli, uni u bru ym ye de u jubab wei da lai u cha u Director yong ka tnat puræ puthi.
Ka seiñ da kyntu ko yaka Office yong ka Director of Education wow yaklam wa ki heh kani ka Company wei wow pyndam noh ya uni u In-charge khnang wa kiwi leh ym haap maad ki yeini waroh wei wow su ya ka poisa wa dang sang yong kiwa kreh.
Kani toh katkam ka khubor wa pyllait da u H. Siangshai, Finance Secretary JSU-1 SC.
Discussion about this post