Ka seiñ JSU Khliehriat Circle hapoh i yahkhmat u President yong ka, u Livingson Sama wa u General Secretary u Emmanuel Bhoi da hiar ki cha ka karkhana Topcem wow kylli yei daw wa ku dor i khyndaw-bilat hapoh ka jylla wei ha Assam won da man i iwa rap toh dor.
Katkam ka yutip wa da yoh lyngba ka Northeast News wa da chem wa ya i khyndaw-bilat da dai du T. 390 chi churia Assam katwa T. 460 won hapoh ka jylla Meghalaya.
U President da ong u wa ka seiñ da ong u wa hawa i khyndaw-bilat da pynmih da ki karkhana wa em ha Meghalaya kiwa da pynjæd ya ki khloo hapoh ka Ri-loom Jaiñtia, iwa rap sñiawsih toh wa wot hadien wa yoh ki u tih moochuni napoh ka jylla kattæ dang dai sy’ad ya i khyndaw-bilat.
Ka seiñ da kyntu ko ya waroh ki tre dukan kiwa dai khyndaw-bilat wa ymtoh u chim tam ki yei dor neibhah ha Assam da dai toh katwa ha Meghalaya won da dai sy’ad.
Ynne ka sngi da hiar ko cha ka yung krehkaam kani ka karkhana wei da ekti ko ya ka dorkhat ha u President ka Topcem u R.K Pareek wow dawa na ka wow pynhiar dor ya i khyndaw-bilat wa da dai hapoh jylla, lym kamtæ ka seiñ daw khang ko u chalan ya ini i khyndaw-bilat cha ka jylla Assam.
