Kamwa leh ha chi tyllup ka pyrthai ynne ka sngi ya ka World AIDS Day, ka Woodland WK Hospital Sabahmuswang, Jowai da pynman ko ya i pynsñiawthooh hajrong ka kjut AIDS hapoh kani ka thaw sumaar kamjooh leh ha Iawmusiang, Jowai.
Ha kani ka thaw sumaar da yoh i batai na u Dr. Jayanta Kumar Hazarika (Medical Superintendent) wa u Dr. Neeraj Kumar, hajrong kani ka kjut.
Da pteiñ leh ya i pynsñiawthooh hajrong kani ka kjut da kani ka thaw sumaar ha Iawmusiang heiwa ki Doctor wa kyntup ya u Dr. Tamon Chyrmang wa Dr. Castor Shylla da e batai ki hajrong kani ka kjut.
Kiwa kreh kani ka thaw sumaar da pynyoo rong kileh ya ka Skit wa e yutip ya ki bru hajrong kani ka kjut wei kammon u ye u kiar na ka kamjooh leh kammon wa ye kiwa chah ktah u yoh ya ki dawai dachin hadien wa chah ktah ki.
Da kyntu leh ya kiwa chah ktah wa ymtoh u murieh ki yei chitom tangwa emkaam wow wan ki chaphrang wow yoh ya ki dawai sumaar wa paka ha i por wa biang.
