Ka MP warim na Tura, ka Agatha Sangma da chimkti ko kam ka Chairperson wa thymme yong ka Meghalaya State Commission for Protection of Child Rights (MSCPCR) ynnin ka sngi, heiwa da lai ko wow yachem leh ya u Montri wa pait ya ka chnat Social Welfare, u Paul Lyngdoh.
Ka Agatha da chah thung ko kam ka Chairperson yong ka MSCPCR ha ka 9 tarik u Naikhynde uni u snem, tangwa da chimkti ya katai ka chuki ha ka 5 tatik uni u bnai, hadien ar bnai duna wa da pynmih yei pynbna. Da ong ko yei daw wa slem ko wow chimkti ya ini i kaam toh neidaw wym em chait bha ko.
Hawa pynsñiaw yei sñiaw yong ka ha ka sngi wa nyngkong wa chimkti yei kaam, ka Agatha da ong ko wa ki Chairperson warim yong ka Commission da leh boon iyi iyi wei dang em chiboon leh kiwa ka da hap ko wow leh.
Hawa yatoh wa i ku ki kaam wym man pyrchah ya ki khynnah, da ong wa emkaam yei ya krehlang na waroh ki liang wow wanrah yei chngaaiñ ya ki khynnah.
“Nga kmen O wa nga em O ha kani ka chuki katni, wei ki khynnah toh kiwa nga sñiawsuk dooh O ha ka pyrthai. Hawa yatoh wa i chngaaiñ ki khynnah waroh i em i ha i jooh i liang wei hap i wow ya krehlang”, da ong ka Agatha.
Ha iwi i liang, ka Agatha kawa man ka diah u Montri Rangbah ka jylla, da kyntait ko yei pynbaad wa da thung ya ka ha katai ka chuki deiwa leh embor. Da ong ko wym em iyi iyi wow klam hajrong i chah pynbaad tang ki kaam yong ka daw klam hi ki.
Discussion about this post