Ka Rebecca Vanessa Suchiang (IAS) ynne ka 30 tarik da chimkti ko kam ka Chief Secretary wa pura ka jylla hadien wa chong-ngiah noh u M.S. Rao.
Kam wow pynkynmoo wa hadien ki 49 tylli ki snem wa da yoh ko ya ka jylla wa pura, ynne ka sngi, ka Suchiang da kynjoh ko sa ya uwi na ki moomær wow man kam ka manbei wa nyngkong ka jylla wa na Ri-Loom Jaiñtia wow ku hadooh kani ka kyrdan Chief Secretary ka jylla.
Hawa klam wa ki laad pathai khubor hawa chimkti ya i kaam, ka RV Suchaing da ong ko wa u moomær wa ka da kynjoh ko ha i im yong ka ym toh wow kut noh, heiwa da pynsñiaw ko yei kyrmen wa hadien ha bood daw em chooh chooh ki kynthai næ ki sahep ki wow pteiñ wow ku næ ksoh ya kani ka chuki sahep wa hakhlieh dooh yong ka jylla.
Ka Suchiang da ong ko leh wa daw em boon bah ki tynjooh ki wow wan kah ya ka luti krekaam yong ka kam ka sahep wa heh dooh, tangwa sñiawskem ko wa da i mynsien ya krehlang yong ki para sahep daw ye wow pynlai bait ya ki kaam ki jaam.
Chooh chooh da ong ko leh wa i ye wow em yong ka da rap slem ha ini i kaam heiwa da i yoh wow ya krehlang wa ki sahep wa rangbah kiwa rap nachwa, da pynheh pynsan bha ya i bor pyrkhat i yong ka wow chimkti won ya kani ka chuki.
Hajrong u pood u ang wa i chongsuk chongsaaiñ, da ong ko wa ya u pood u ang daw hap wow yang ya ka bui (Report) ka Committee wa da thung da ka sorkar, katwa ya i chongsuk chongsaaiñ da pynsñiaw ko wa emkaam wow rap pynbha neibhah kamwa man katni, ym man iwa chngaaiñ, tangwa da pynsñiaw ko leh yei kyrmen wym em won iwon iwon i jia wa sñiawsih.
Hawa pait won ya ki kaam wa hakhmat dooh wa ki thong kiwa da em, ka Suchiang da prooid dak ko ya i puræ puthi, i chait i khiah, kiwa man ki bynta kiwa kongsan tam kiwa kam ka sahep wa da heh daw yaleh ko wow paitbniah wow chong bichaar sani bha kammon u ye wow pyntyllung rap smat ya i kaam ha kini ki bynta deiwa pynrap lang wa kiwi kiwi ki kaam kiwa sahteiñ, ya kiwa daw hap booddien wei wow kreh chitom wow pyndep ya ki.
