U Wailadmiki Shylla uwa man u MLA ka NPP na Jowai, da chimkti u kam u President wa thymme ka National People’s Youth Front (NPYF), hadien wa kut noh ka samoi krehkaam yong u Kitborlang Nongrem.
Ya u Wailad da pynkhamkti kam uwa yahkhmat wa thymme ka NPYF ha ka yalang kawa da pynman ha yung krehkaam ka seiñ, heiwa da emlang leh kiwi kiwa yahkhmat ka NPP wa kynthup ya u James PK Sangma uwa man u National General Secretary (Organisation), neitæ u Working President ka Meghalaya NPP, u Hamletson Dohling, uwa e ktien ka seiñ, u HM Shngapliang wa u Nick Nongkhlaw National President ka NPYF najrong kiwi kiwi de kiwa yahkhmat.
U President wa thymme ka NPYF, u Wailadmiki da ong u wa daw kreh u neibynta i miat i bha ki khynroo ka jylla salonsar khamtam hawa yatoh wa i yoh kaam yoh jaam wei khamtam dooh wow pynsñiawthooh yei maa i drugs. Da ong u leh wam u khynroo, oo sñiaw u yei kaam wa khia najrong wa da man u kam u MLA, tangwa ym ye won wow kyntait yei kaam wa kiwa yahkhmat da pynkit ki ha oo.
Heijooh i por da pynsñiaw u yei yaroh ya ka sorkar MDA hapoh i yahkhmat u Conrad Sangma kam u Montri Rangbah, wa da wanrah u chiboon ki kaam pynroi hapoh ka jylla, heiwa da pynsñiaw u wa ngait u wa i maya jaitbru ymtoh u man ko du hei ktien donhi.
Discussion about this post