U Montri Rangbah ka jylla, u Conrad K Sangma ynne da yachem u wa ki bor District ka South Garo Hills ha Dimapara yow tip hadooh katwon wa da chah ktah ki yung ki sem nei chlai um syndet hapoh ka District.
Waroh da em 40 tylli ki chnong kiwa da chah ktah kiwa em ha 3 tylli ki Block heiwa waroh ki bru wa da chah ktah da em ki 2510 ngut na 462 tylli ki manyung.
Da em leh 7 ngut kiwa chi yung kiwa da chah tlep pynim deiwa chah ban khyndaw nadooh ka beipun, ka khon, ki ksu wa pyrsa kurim iwa da jia ha ka 4 tarik ha chnong Atisia Songmong wa em ha ka thaaiñ Gasuapara heiwa ya waroh da ye u sai ki.
Ya kini ki 7 ngut da tlep ki chirup deilang ha i ini i thaw wa jia ini i oor khyndaw.
U Conrad da ban joor u yei emkaam wow thooh bniah yow ye u tip kammon wow lait nei jia wa sñiawsih neini chakhmat nei chlai um.
Da phah u leh ya ki heh sorkar wow pynsmat ki u pynchna yeiwa da sih kamjooh wow e yarap cha waroh kiwa chah ktah.
Na Dimapara, u Conrad dapoi u ha ini i yung wa chah ban khyndaw deiwa lai 2 Km dei kjat.
Da e kti u leh ya ka poisa yarap cha kiwa lait im neini wa jia heiwa uwi toh u Watison Marak uwa da dooh ya 5 ngut kiwa chi yung u wa cha u Baseng Momin, uwa da dooh ya ka kurim wa u khon u uwa dang chi snem chiteiñ ha ini i jooh i thaw.
U Conrad da chimbynta u leh ha ka yaseiñ duwai wa da pyman ha kani ka thaw wei da kular u leh ya ki paidbah wow pynchna smat ya u sarok kamjooh yow pynbiang ya ka bordiñ.
Discussion about this post