Da: U Khroo Lamsanki Pariat
Ha kani ka 21 tarik wa dap 51 snem ka jylla Meghalaya wa maya ka yong i. E O ya i sñiawngooh iwa khroo ya ki waheh kiwa da yaleh doh im, doh yap yow pynyoh ya ka jylla Meghalaya hadooh wa im i hadooh ynne ka sngi wa daw im chooh chooh i neini. Ha ka 22 tarik u Thohlakhmi (Feb) ka Ri Jaiñtia daw dap won ko 51 snem i yoh District wa 76 snem ka ri India ha ka 26 tarik uni u bnai.
Kyntu O ya phi u chim yei kaamram wa i kitkhlieh wa na nga, wa na i yow nang pynbha pynroi chooh chooh yow skem u chngaaiñ i mantre manda tymmen kamwa da diang i na ki manchwa longchwa ki yong i wa daw e kti won i ha ki khon ki pyrsa kiwa daw heh neini.
Kattu neini pynkhreh da ka thong kiwa kwah phi u man ka Meghalaya ha ki 49 snem wa daw wan namo u dap 100 snem ka Meghalaya ka ri Jaiñtia yong i.
Related posts
Hei yoo i yong nga samen samen ya ka jylla wa ka Ri Jaiñtia ka yong i, u Blai da e bor e mynsien bha u yow man kiwa tipbru tip Blai, u yarap kylliang, u yachaan kylliang, u ri ya ka jait ka kur, ka dustur ka riti, ka ktien, u rep kba rep jhoor, u ri ya ka riam ka bait, u ksoh ya ka khyndaw, u sumaar ya ki khloo, u pynemkaam ya ki moo ki dieñ, sa i stat hei khih u kamai hadooh i manheh ha ki chnat ka sorkar, yow ya imlang sahlang i.
Ha ka synchaar ka khadar hadooh ka sorkar, hadooh ka chnong ka dong hadien ki 51 tylli ki snem na i yahkhmat ka Khimusniang Dorbar Chnong neitæ ka Panaliar Dorbar Chnong kyntu kyrpaad sa ka seiñ VBJ wa kreh monsñiawbha yow bha ka Ri Jaiñtia. Kattu ki Waheh Chnong yong ki Dorbar Chnong ha Jaiñtia da rai ki wa u pynkyrpang chooh chooh ya ka yalap jied MLA ha ki sngi kiwa daw wan. Yeini e ngooh O ya ki waheh ka Synjuk Waheh Chnong Ri Jaiñtia wa ki waheh ka Synjuk Waheh Chnong Jowai kiwa da pynchlur ya kiwi ki dorbar chnong, “Chirup ye hi i” da yoh mynsien ki manbei manpa waroh.
Kyrpaad O ya phi ki khynroo ki chynrang ki manbei u mih hakhmat yow yarap wa u waheh chnong ki dkhot chnong yow nang bha chooh chooh i im ka chnong kamwa da mang ki. Chiruplang du iwa ye u leh khamtam u pynbha pynmiat.
Ha ka puræ nadooh nachwa da rap wan bha i rap chakhmat. Tangwa ha kini ki sngi yoo kamwa ka imlang sahlang da sdang won ko u jngai du neidaw wa ya beh por hadooh wa da sdang u chim yei por kiwi wa ym dap de du i por i yong i, heijooh i por da em leh kiwa yoh por chawa palat hadooh wa sya ki u poi noh i janmiet, yow yoh u yachem wa ki lok, kiwa ha-yung ha-sem. Ka dur yong ki warep kba dang tlot da swe wa ym em ka bor sorkar kawa pyntoh pyntne yei emkaam ki warep. Hanla kattæ leh, katwa ye wa lah, yaleh hi u im u yakrehlang hawa khut ka sorkar ka chnong. Tangwa ka yukylli wa mih ha kini ki sngi, chngaaiñ hi mo i im hawa yoo ha yaaw ha haat wa u mynder ri yoo kamwa da sdang u ku u kreh u khih ha kini ki loom ki pdeiñ ki yong i? Tangwa kamwa ong ka ktien “Haba la than eh ka suk ka don ka ma.”
Ini waroh i man i long ha kini ki sngi kiwa katni yoo O wa i por da dawa bha ko ya phi ya nga wa ym toh de u kylli i, “Yi u leh ka ri wa ka jylla ya nga namo ka sorkar, tangwa kylli noh samen samen, yi u leh O neibynta ka ri India ka Meghalaya wa maya yong nga?” Manda sdang i u kaap chikaap chakhmat chirup wa i thrang wa em ha i mynsien ha ka pyrkhat wa u kreh bha O ya ka ri, kattæ sæ u yoh i da ka sorkar kawa u chlur i u ong lang ka sorkar ka yong nga, ki manbei ki kynthai khynnah kmenlang ki u im. Da bha ka synchaar da chngaaiñ i im ka ri ka jaitbru yong i.
Kamtæ kyntu O ya phi waroh kiwa maya ya ka ri India wa ka jylla Meghalaya, phi ki tre ri tre muluk wa khamtam ya phi ki waheh ki manbei, ki khynroo khyllood kiwa daw man waheh neini. Kynmoo won wa manda chngaaiñ ka ri wa ka jaitbru ka yong nga, u suk ka yung ka chnong ka yong nga, i yoh i yong nga, i jop i yong nga ha kawon kawon ka yakhun u em yurim em dor i. Kamtæ booh ki hei pyrkhat, pynman kaam ya katæ ka kaamram, wa ha ka yap ka im ka ri wa ka jaitbru, nga u mih O haphrang u yaryntihlang u ya sñiawthooh yumut O chirup wa kiwi, yow pynkhai u pynyieñ lang i sa chisien, yow nang pynskem nang pynroi ya ka jait ka kur, u sumaar u pynbha ya ka um ha ki tyllong ki wah, u pynskem ya ka khyndaw, ka la’ær wa pynngaad na ki dieñ ki siej, u biang ka bordiñ, ka khih ka kamai u chngaaiñ ko, khamtam i im da suk da i, u biang u dap ha i emkaam iwa man-ka-sngi.
Blai e bor e mynsien yow yoh bor ka ri India ka Meghalaya wa maya yong i.
