Chisien cha suiñ chisien cha kiwa khayi tooh siat ki BSF heiwa jia ha Shella, mynsoo lang wa u nong Bangladesh

Hadien wa yap uwi u bru wa tip kam u Arsen M Marak ha u kuli ki BSF ha chnong Dalia kawa haap hapoh ka Shella Bholaganj Block, East Khasi Hills, neiliang ki BSF da phah ki yaka khubor yow pynche yeiwa da jia.

Da ong wa ki BSF hadien wa tip tikna ki wa em kiwa lai khayi tooh ya u piat wa i chini, kamtæ da lai hiar ki cha ini i thaw hei miet ka 1 tarik ha i thaw wa em ka 110 Bn Border Outpost.

Manda poi ha ini i thaw da yoo ya kini ki bru wa kit ya ki mar yong ki kiwa da lai cheiliang u pood waka Bangladesh wei heini i por da mih leh ki nong Bangladesh cha kylla pood kiwa da yang yow chimkti ya kini ki mar.

Kamtæ ki BSF da phah sangeh ki ya kini ki bru wa em cheiliang ka India tangwa ym sangeh ki wei da lai bait ki chajan u pood ka Bangladesh.

Related posts

Yoh pynlait ya ka kynthai kawa na East Jaiñtia wa chah kset yabor ha Delhi

May 11, 2025

Yoh kem mooyong hadooh 6000 MT ha East Jaiñtia Hills

May 10, 2025

Da ong leh wa hadien ini, kini ki bru da kær soodong ki ki BSF wei da sdang ki wow dat moo. Neiliang ki BSF nyngkong da jubab ki deiwa pynemkaam da ki lathi wa dei kti yow beh ya kini ki bru tangwa kini nang joor i chlur wei da sai ki da ki wait wa ki deiñ yow dat ya ki BSF wei da ptieñ ki leh wow kawang moo heiwa da mynsoo 3 ngut ki BSF heiwa uwi da mynsoo joor u neibynta i khmat timun u wei da kit ya oo cha Shillong.

Chooh chooh da pyntip wa ki BSF da maham ma maham ki ya kini ki bru tangwa da toor bait ki chajan ki BSF deiwa thmu wow pynmynsoo ki wei da pyrchang ki leh wow knieh ya ki suloi ki, kamtæ deiwa sñiawthooh yei maa, da siat nyngkong cha suiñ yow yut kini ki bru tangwa ym em bna ki yeini wei dang joor i dukhi ki.

Manda yoo yeini, ki BSF da siat ki chi kuli cha kini ki bru wei heini i por da yapra noh ki wei da yut waroh arliang na ini i thaw.

Hadien ini won, da tip wa em uwi u bru wa khayi tooh da khlaad u ha ini wa jia wei da em leh uwi u nong Bangladesh uwa da mynsoo.

Ki BSF da ong ki leh wa kani ka thaw toh kawa chim kabu bha da kiwa khayi tooh kiwa da wan kit da ki masi, chini, piat, kiad wa kiwi kiwi de ki mar yow phah cha Bangladesh wei da em ki leh kam ki seiñ kiwa khayi wa krehkaam ha kani ka thaw kiwa da kwah wow pynthut yei chongsuk du neibynta i myntoi samen ki.

Da pynkut deiwa ong wa dang pynman yei takit heiyatoh wa ini wa jia.