Jowai: Ka Meghalaya Bharat Scouts & Guides West Jaiñtia Hills District kam chibynta i leh burom ya ka Bharat Scouts & Guides Foundation Day kawa haap ha ka 7 tarik u Khonchonglad wot hapyrdi i khanglaad wei pynwit pynthut yong u khñiang khlam COVID-19 dei sñiawkhia da chim ko wow pynkyrpang ya kani ka sngi ha uni u snem deiwa pynman ya ki prokram pyn ka-it wa chitayaw kawa sdang nadooh ka 3 tarik u Khonchonglad wei ka wow kut ha ka 9 tarik yong uni hi u bnai.
Da sakhi yei sdang yong kani ka tayaw lehkmen lehburom wa man ha ka sngi Mulong 3 tarik, da em ka yalang wa tbian hei pynlai u Ohiwot Laloo, District Secretary, MBS&G West Jaintia Hills hei emlang ka Saramai Tariang, District Commissioner Guides, u Jt. District Secretary, MBS&G u Adiam u Bthuh wa kiwi dkhot ka seiñ.
U Ohiwot kam u chongknor yong kani ka yalang nalor ki kyntien yahkhmat da e u leh i khanna pynsñiaw yei parom watbian i man kyrpang ka Bharat Scouts & Guides Foundation Day ha chityllup ka ri India.
Ka Saramai Tariang hei e kyntien kam ka kongsan, heiyatoh wa ka phang (Theme) yong kani ka tayaw lehkmen lehburom kawa ong “Scouting for Fun” da pynchiap chooh ko deiwa ong “Scouting for fun with a Purpose” iwa mut iwon iwon i kam næ i ka-it, i chutia danda iwa ki khynnah Scouts-Guides, Rovers-Rangers chim ki wow leh, toh iwa em da ka thong wa ka yurim wei iwa man leh ka laad ka luti wow saindur saindar yei long i man ki khynnah hei miat i bha nadooh wow yoh yei kmen i ka-it mynsien, i chait i khiah hei doh i pran wei thij i pyrkhat wei wow man leh ki bru wa em i mynsien wow e i chakri wa miat wa bha ha ka imlang sahlang yong ka ri wa ka jaitbru.
Ya ki yakob pyntawbuit pyntaw sap waroh ha chitayaw lynter neiliang ki bor pynlai ka seiñ neidaw wa em ka khlam, da elaad ya ki khynnah Scouts-Guides, Rovers-Rangers wow yachimbynta ki na yung dep neitæ wow phah won ya iyi iyi iwa leh ki ha ki Mobile.
U Dr. R.R. Kharkongor, Principal Thomas Jones Synod College, Jowai wa man leh kam u Commissioner Scouts hei wan sakhi ya kani ka tayaw lehkmen lehburom ha ka sngi Muchai 5 tarik, da e mynsien u ya ki Scouts-Guides, Rovers-Rangers deiwa ong e wa iwon iwon i kaam wa leh phi heiwon heiwon i dur nae i rukom u man i ki mot sahnaam sahkynmoo ki wym wiar wympleh de.
Chooh chooh ha ka sngi wabood ka 6 tarik, ya kani ka prokram da wan sakhilang leh da u Richard B. Uriah, District Commissioner Scouts hei emlang u D.E. Pariat, Commissioner Scouts wa kiwi ki dkhot ka Meghalaya Bharat Scouts & Guides, West Jaiñtia Hills.
Neiliang ki khynnah Scouts-Guides ha kani ka sngi markhmat da yohlad ki leh wow pynyoo pyntaw yei sap wei ka-it yongki kiwa kynthup ya ka Funny Dance, Funny Smile, Funny Dress- Funny Walk, Face Expression wa kiwi kiwi.
