U Montri Rangbah ka jylla, u Conrad Sangma deilang wa u Montri ka chnat Tourism, u Paul Lyngdoh ynne da pynlait paidbah ki ya ki kari kamai da ki Innova Cyrsta kiwa em 16 tylli kam chibynta ka PRIME Tourism Vehicle Scheme cha kiwa da yaleh wow yoh ya kini ki kari.
Ya kini ki kari da em palat 600 ngut kiwa da yaleh yow yoh heiwa da jied chwa 47 ngut wei hadien wa pyndep ya waroh ki kyndon da pynlait chwa ya 16 tylli ki kari ynne wei da em ka thong ka sorkar leh wow pynlait 500 tylli ha ki san snem kam chibynta wow e kreh ya ki khon khynroo ka jylla kiwa em hei kaam wa yatoh wa i uiñke suwari.
Ini leh man ko kam wow pynkhreh yei boon i wan tooid kiwa uiñke suwari chapoh Meghalaya yow pynsuk ya ki wow lai cha ki thaw wa kwah ki da ki kari wa miat wa syad dor.
Yeini da leh hadien wa da dep thooh bniah wei da chem wa duna ki kari wa miat wa ye kiwa uiñke suwari u pynemkaam khamtam kiwa kiwa da khreh wow pynlut rap boon.
Ka sorkar da yarap thied ko ya kini kari deiwa e Subsidy 50% nei dor ka kari iwa kynthup leh wow su ya ka ram cha ki Bank neibynta ki ar snem.
Hapoh kani ka Scheme ka sorkar jylla da pynlut ko hadooh T. 6 klur wei i kyrchaan poisa kynthup ko hadooh 90% i su nyngkong (Down Payment) yow ye kiwa thied u sai ya ki kari iwa dapoi T 1 lak kawi ka kari. Najrong ini da su leh 20% ka ram man-u-bnai yow pynsuk ya kiwa pynkreh ya kini ki kari.
Ya kini kiwa yoh ya kini ki kari da yoh ki leh yei sikai na ka sorkar heiyatoh kammon wow man kiwa tip u man kiwa emburom yow man chngaaiñ kiwa chong kari.
Kini ki kari toh kiwa da pyndait lang wa u GPS yow suk u booddien ki lada jia iwon iwon wei da e leh ya ki Life Jacket, First Aid Box katwa cha kiwa pynlai ya ki thaw uiñke suwari da e da ki tiar yalehke ha ki um wei da em leh i e sikai ya kiwa kiñ lien wei wow leh CPR yow pynlait im ya kiwa kiwa ngam um neibynta ki thaw wa em ha Shnongpdeng, Sohra, Darrang, Dawki, Umsyiem wa kiwi.
