Ki paidbah yong ka chnong Pasadwar, da chimkti ki da ki hi wow chna ya ka yung skur wa thymme yong ka Upper Primary School Pasadwar kawa da seiñ ha u snem 1987 wei katni da man ko kam ka skur ADHOC ka sorkar.
Kani ka skur em ko soo ngut kiwa sikai wei kani ka skur da pynmih ko ya chiboon kiwa da man kam kiwa sikai, kiwa da kreh kaam sorkar wa kiwi kiwi de.
Neidaw wa hadien boon tylli ki snem wa da pynlai ya kani ka skur wei da em ki bynta yong ki kynroh wa da oor da piah wei ki tin leh toh kiwa da pai um iwa da ktah bha ya kiwa sikai kamjooh ki khynnah skur heipor lyiur. Neiliang yong ki paidbah lyngba u Waheh Chnong, u Firstborn Pamblang da khana wa da thooh ki laad ki luti na ka sorkar wow pynchna noh da kawi ka yung skur tangwa ym em yoh yarap iyi iyi leh na ka sorkar. Tangwa da ong u wa ym em pynbaad ya kiwon kiwon kiwa mihkhmat yong kani ka thaaiñ.
Kani ka yung skur toh kawa da pynemkaam leh neibynta wow thap Vote namo ka Polling Station ka Pasadwar neibynta ki ar chnong heiwa da dep kyrpaad ya kiwa pait ya ka Election wow pyrkhat ya ini i yung skur. Ka chnong da ong ko wa ha uni u snem ka Election u lai bait tangwa ha u snem wow wan daw hap tympra noh ya kani kawa da rim neibhah wa da booh hei maa ya ki bru.
Da ong leh wa ka chnong Pasadwar toh kawa da em da ki spah snem tangwa hadooh katni tang ka Hall leh ym em ko da kawa heh wei kiwa boon ki yalang da hap wow pynman ha madan.
Ka Dorbar Chnong Pasadwar lyngba u waheh chnong da pynsñiaw u yei sñiawngooh wa khroo ya ka Pasadwar Senglang Club, ka Village Defense Party (Pasadwar), ki kattu katni ngut ki bru samen wei khamtam ya ki khynroo yong ka chnong wa kiwa chong chnong hi waroh kiwa da noh sñiawbha wei kiwa da kreh chitom wow pynmih poisa yow pynman kaam ya ini i kreh ya ka kani ka yung skur wa thymme ka Upper Primary School, Pasadwar.
Da pynsñiaw leh yei kyrmen wow pyndep noh ya ka kani ka yung ha kini ki 3-4 bnai wow wan yow pynsuk ya ki khynnah skur khamtam ha i por lyiur.
