Ka Border Security Force (BSF) da chna ko da ka yingkieñ lai kjat kawa da chna da ki siej ki chken neibynta kiwa chong chnong ka Huroi, East Jaiñtia Hills kawa da wan wai ynnin ka sngi.
Kani ka yingkieñ da chna ya ka najrong ka wah khian yow pynskuk ya ki paidbah ha ki por slap wei da em i thmu wow chna sa phra tylli kini ki jait yingkieñ.
Ya kani ka yingkieñ da yarap poisa leh da ki bor District ka East Jaiñtia Hills wei da wan wai ya ka da u DC ka District, u Abhilash Baranwal deilang wa u Sanddep Rawat DIG SHQ Jowai.
Ka BSF da khut ko leh ya ki bru samen wow yarap poisa yow pynkrehkaam ya kiwi ki jait kaam kiwa daw yarap ya ki paidbah.
Neiliang u DC ha kani ka sngi da lai pait u leh ya ka Huroi Sub-Centre waka Huroi Secondary School heiwa da chem wa ka Sub-Centre emkaam Battery wa u Inverter neibynta ki Solar Panel wei neiliang ka skur da paan ki ya ki Computer, ki tiar yaleh Sport wa ki tiar tem tiar put neibynta ki khynnah.
Neiliang u DC da pyntip u wa daw lai rah ya kini ki dawa cha ki bor wa hakhlieh kini ki chnat.
