Jowai: Ki bor pait bor pynlai ka Meghalaya Bharat Scouts Guides waka Indian Red Cross Society, West Jaiñtia Hills District da chibynta ki wow man ka laad yada yei poor yong u khñiang COVID-19 deiwa booh ya ki thaw saitkti næ ki Hand Washing Basin ha kawi na ki bynta yong ka Iawmusiang wa em marpyrchah waka JHADC.
Ya kini ki thaw saitkti da wai ynne ka Musiang 13 tarik da ka Saramai Tariang, District Commissioner Guides, West Jaiñtia Hills wa u W. Lyngdoh, Chairman Indian Red Cross Society, West Jaiñtia Hills hei emlang u District Secretary MBS&G u Ohiwot Laloo wa kiwi ki dkhot ka seiñ wa kynthup ya ki Scouts Master, Guides Captain, Rovers wa ki Rangers.
Ha ka yalang wa tbian chwa wow wai da yoh yei klam i batai hajrong ini i thmu na u Ohiwot Laloo, ki kyntien naka kongsan wei pynbood won i kyntien khublei ha ki bynta wakut na u Jt. District Secretary MBS&G West Jaintia Hills u Adiam U Bthuh.
U W. Lyngdoh hei klam da ong u wa i chna ya kini ki thaw saitkti toh chibynta wow pynyoo i dak ya krehlang waka sorkar ha ka thong wow yada nei poor ka khlam COVID-19 hapoh ka District wei man ko leh ka luti wow e wyrta chula hapyrdi ki bru wa wan yaw wan haat wow saitkti dei langær iwa man iwa emkaam bha.
Ka Saramai Tariang hei e kyntien da yaroh ko yeini i kaam iwa man i myntoi wa khroo ya kiwa wan yaw wan haat wei ha lyndet ini waroh toh i chynna jngai yong ki dkhot ka seiñ. Neitæ iwa kyrpang khut kyrpaad ko yaki paidbah wa lai wa wan wow chim ki u pynkrehkaam hok ya kini da ka luti watoh rukom wei ymtoh u chim kabu ki wow pynemkaam bakla ya kini ki thaw saitkti.
