Shillong: Ka dhab ka seiñ saiñ pyrthai, ka Regional Democratic Alliance (RDA) wa kynthup ya ka UDP, HSPDP, ka People’s Democratic Alliance (PDA) wa kynthup ya ka NPP, PDF wa ki MDC samen, ynne ka janmiet da chim ya ka rai wow krehlang ha Khasi Hills Autonomous District Council (KHADC) deiwa chna ya ka Executive Committee wa thymme hapoh ka United Democratic Alliance (UDA).
Hawa yaklam hadien ka yalang, u Teinwell Dkhar da pyntip u wa ka UDA katni em ko 19 ngut ki MDC kiwa da wan wow krehlang wa kynthup lang ya u MDC samen ka Nongthymmai, u Latiplang Kharkongor.
“Da jied ya nga wow man u Chairman ka UDA wa ya u Pyniaid S Syiem kam u Secretary. I da rai i leh wa ya kaam Chairman ha KHADC u e kti ha u Pynshngian N Syiem,” da ong u Teinwell Dkhar uwa man leh u CEM ka UDA neibynta chisnem.
Ha iwi i liang u Chairman ka PDA, u Lambor Malngiang da ong u wa ini i rai ym toh iwa kahddooh wei lada emkaam daw pynbait biang. “Ka sur yong ka PDA neibynta i kaam Chairman ha KHADC u lai ko cha u Pynshngain,” da ong u.
Neiliang ki MDC ka UDA da pyntip ki wa kiwi ki kaam wow jied ya u Deputy CEM, Deputy Chairman wa ki Executive Member hadooh katni ym pu em yaklam.
“I dang ieh chwa i ya kiwi ki kaam wei daw yaklam ya ini hadien wa yoh ya u CEM wa Chairman wa pura,” da ong ki.
Hawa kylli hadooh katwon sñiawtikna ki wa ka UDA u neh ko ha KHADC, neiliang u Teinwell da ong u, “Waroh ki MDC ki em ki ka jooh ka yumut wow pynneh ya ka UDA, kam i thmu wow booh CEM hadooh 3 ngut hapoh ka 5 snem ym ktah ko.”
Discussion about this post