Ka High Court ka Meghalaya ynnin ka 28 tarik da chong bichaar ko sa kawi ka mukotduma PIL wa yaleh da u Champer M. Sangma kawa yatoh wa i chalan tooh ya u mooyong wa da tih pyrchah ya ka aiñ hapoh ka jylla Meghalaya.
Heiyatoh wa ini i kaam, neiliang ka jylla Meghalaya waka Assam da dep ki wow e jubab lyngba ka Affidavit hajrong i chah pynbaad deiwa pynbiang ya ki kot ki sla wa yatoh wa i chalan mooyong.
Ha kani ka PIL wa katni da ong u wa yaleh mukotduma wa biang ki kot ki sla kam ki sabut wow pynyoo wa em hi u mooyong wa psiah chapoh ka jylla Meghalaya tangwa heijooh i por da em 40,000 MT u mooyong wa da mih noh napoh ka Meghalaya heiwa uwa yaleh mukotduma da ong u wa ym ye wow leh yeini khlem da em i ya krehlang kiwa boon.
Ynnin ka sngi da man ko leh ka sngi wow chong bichaar ya ka mukotduma kawa da leh hi da ka High Court heiyatoh wa i tih mooyong pyrchah ya ka aiñ, kamjooh leh u chong bichaar yei em ki karkhana Coke wa krehkaam pyrchah ya ka aiñ hapoh ka jylla.
Kamtæ ka High Court da chim noh ko ya ka rai wow bichaar syndon ya kini waroh ha ka 13 tarik uni u bnai deilang wa ka mukotduma yong u Champer M. Sangma.
