Jowai: Ka Meghalaya People’s United Front (MPUF) ha kani ka 10 tarik wa da dep, da pynman ko ya ka yalang yong ka Central Executive Committee heiwa da emlang leh ki President ki Unit wa ki Circle waphær waphær kiwa ya chong phyllu yumut hei yatoh wa ki aiñ wa yada ya ki khian paaid kam ka Meghalaya Transfer of Land and Regulation Act 1971, ka Labour Immigrants Act, ki Work Permit Act waka Tenancy Bill kam jooh i wan ka rel hapoh ka jylla.
Heiyatoh wa ka Land Transfer Act da yaklam hei yatoh waka Section 4(1)e waka 4(1)f kawa da leh u Chief Minister wa ki kattu katni ki heh sorkar khlem pyntip cha ki paidbah. Kini ki kyndon kani ka aiñ elaad ko ya ki Company namo ki hehspah wow chim wai kamjooh wow thied thaw hapoh ka jylla yow chna kharkhana wa kiwi kiwi.
Yow pynsuk yeini da pynmih leh sa ka Single Window Agency (SWA) kawa da khlieh da u Chief Minister kawa e bor ya kiwa na Company yow smat ki u yoh ya ki NOC kamjooh ki thaw wei hapoh ka SWA ym em ki ADC, ki raij, ki hima, ki dolloi wa kiwi kiwa pait yei hok ki tre ri.
Kamtæ ka seiñ da dawa wow pyndooh noh ya kini ki kyndon ka aiñ.
Heiyatoh won wa ki aiñ wa pait yei wankreh ki baarjylla ka seiñ kwah ko leh wow pynkhlan ya ki deiwa chna ya kiwa boon ki aiñ hei yatoh wa ini.
Ka seiñ leh da ong ko waka Land Acquisition Bill kawa ym pu em man aiñ daw ktah joor ko ya ki paidbah, kamtæ yow ye u lai cha khmat da paan yei kyrchaan na ki paidbah neibhah emkaam i yatylli yow ye u pynku ya ka jaitbru.
Discussion about this post